Qazaqstan Taliban qozǵalysymen (Qazaqstanda jáne basqa da kóptegen elderde tyiym salynǵan) kelissózder júrgizgenimen, onyń jumysyna el aýmaǵynda salynǵan tyiymdy alyp tastamaidy. «Ashyq dialog-2» suhbatynda QR Prezidenti Ákimshiligi basshysynyń birinshi orynbasary Dáýren Abaev osyndai oi aitty, dep habarlaidy QazAqparat.
«Talibanmen (Qazaqstanda jáne basqa da kóptegen elderde tyiym salynǵan) kelissózder júrgizý beitarap qalýdan áldeqaida aqylǵa qonymdy qadam dep aitýǵa bolady. Ondaǵy áleýetti gýmanitarlyq apat Aýǵanstannyń jeke ishki problemasy bolýdan qalyp barady. Bir jaǵynan Taliban qozǵalysyna terroristik uiym retinde salynǵan tyiymdy alyp tastai almaimyz. Tyiym salmaý - bizdiń azamattarǵa ol uiymnyń qaǵidatyn ustanýǵa ruqsat berý bolar edi. Bul búginde aqylǵa qonymsyz ekenine kelisetin shyǵarsyz. Talibannyń basyndaǵy jaǵdai - saiasat degen kúrdeli ári qaishylyqqa toly dúnie ekenin kórsetip otyr», - degen Dáýren Abaev QR Syrtqy ister ministriniń búgin ǵana osy másele boiynsha málimdeme jasaǵanyn eske saldy.
«Búgin ǵana Syrtqy ister ministri málimdeme jasap, Talibannyń moinyndaǵy «terroristik uiym» degen grif búkil álem qaýymdastyǵynyń ortaq sheshimi negizinde ǵana alynýy múmkin ekenin aitty. Árine, birinshi kezekte BUU-nyń uiǵarymy bolý kerek.
Jalǵyz biz ǵana Taliban qozǵalysymen kelissóz júrgizip jatqan joqpyz. Álemdegi iri derjavalar da, osy óńirdegi ózge memleketter de osylai istep jatyr. Dál qazir, bastapqy kezeńde Talibandy halyqaralyq bailanystar men mindettemelerge tartý óte mańyzdy. Osylai ǵana eki nársege qol jetkizýge bolady. Birinshisi – eldiń aýmaǵyn ózge memleketterge ziian keltirý úshin paidalanýǵa jol bermeý. Ekinshisi – basqarý rejimin jumsartý. Aýǵanstannyń oqshaý qalýy eshkimge jaqsylyq ákelmeidi. Kerisinshe, odan ári radikaldanýǵa jol ashady», - dedi Prezident Ákimshiligi basshysynyń birinshi orynbasary
