"Taliban" radikaldy qozǵalysy Úkimet basshysynyń orynbasary Abdýl Ǵani Baradardyń bilik bólinisi boiynsha týyndaǵan daýǵa bailanysty óltirilgenin joqqa shyǵardy. Dese de, "Taliban" (Qazaqstanda terroristik uiym dep tanylǵan) basshylarynyń óz ishinde qaishylyq paida bolǵany jaily sybystar kúsheiip barady, dep jazady Azattyq.
Buǵan deiin Úndistannyń keibir aqparat quraldary men áleýmettik jelilerinde Abdýl Ǵani Baradardyń qaza bolǵany nemese aýyr jaraqattanǵany jaily aqparat taraǵan. Onda "Taliban" qozǵalysynyń óz ishindegi túrli fraktsiialar arasynda bilik bólinisi jóninde kikiljiń týyndaǵany aitylǵan.
"Taliban" ishki daý-damai jóninde sybysty joqqa shyǵardy. Qozǵalystyń resmi ókili Sohail Shahinniń aitýynsha, Abdýl Ǵani Baradar aýdio habarlama jiberip, "óziniń jaraqattanǵany nemese óltirilgeni týraly aqparatty" joqqa shyǵarǵan.
"Ol bul ótirik jáne oǵan eshqandai negiz joq dep aitty" dedi Shahin málimdemede.
Taliban odan bólek, Baradardyń Kabýldan Kandagarǵa ketkeni jaily qolhattyń sýretin de jariialady. Biraq "Taliban" taratqan aqparat qozǵalys tóńireginde sybystardy údete tústi.
Baradardyń jurt aldyna shyqpaǵanyna birneshe kún boldy. Ol 12 qyrkúiekte Kabýlda Katar syrtqy ister ministrimen kezdesýge qatysqan joq.
7 qyrkúiekte tálipter Aýǵanstan úkimetiniń jańa quramyn jariialaǵan. Sol kezde úkimet jetekshisiniń orynbasary mindeti Abdýl Ǵani Baradarǵa júktelgeni belgili bolǵan.
