Ondaǵan jyl boiǵy soǵystan ábden tityqtaǵan Aýǵanstannan shetel áskeriniń túpkilikti áketilýimen tuspa-tus shabýylyn bastaǵannan beri "Taliban" radikal qozǵalysy alǵash ret aimaq ortalyǵyn basyp alyp, baǵyndyrdy.
Eldiń shalǵai ońtústik-batys túpkirindegi Nimroz ýálaiatynyń ortalyǵy Zaranj qalasy 6 tamyzda "Taliban" sodyrlarynyń qolyna ótti. Bul týraly Azattyqtyń Aýǵan qyzmeti – Azadi radiosyna jergilikti sheneýnikter men aimaqtyq keńestiń bir múshesi habarlaǵan.
Aty-jónin ataǵysy kelmegen birneshe jergilikti sheneýnik 31 myńǵa jýyq turǵyny bar qalanyń uryssyz berilgenin aitqan. Zaranjdyń qulaýy – "Talibannyń" tynymsyz shabýylynan qorǵanýǵa tyrysyp jatqan Kabýl úkimetine berilgen taǵy da bir soqqy boldy.
Keiingi aptalarda "Taliban" ondaǵan aýyldyq okrýgti basyp aldy, shekara ótkelderine baqylaý ornatyp, birneshe iri qalaǵa, sonyń ishinde Aýǵanstannyń batysyndaǵy Geratqa, ońtústiktegi Qandaǵar men Lashkargahqa shabýyl jasady.
"Taliban" 6 tamyzda eldegi resmi úkimettiń aqparat jáne media ortalyǵynyń basshysy Dava Han Menapaldy óltirgenin málimdegen. Bul – tálipterdiń el úkimetiniń eń jandy jerine soqqy berýge qaýqary jetetinine taǵy bir dálel.
BUU Qaýipsizdik Keńesi 6 tamyzda Aýǵanstandaǵy jaǵdaidyń nasharlaýyn talqylaǵan kezde, qarýly qaqtyǵystar men beibit turǵyndardyń qurban bolyp jatqany da kún tártibinde engizildi. BUU-nyń Aýǵanstan boiynsha arnaiy ókili Debora Laions "Talibannyń" eldegi ahýaldy saiasi jolmen retteý jónindegi ózine alǵan mindettemesin laiyqty atqaryp otyrǵanyna kúmán keltirdi. Buǵan qosa Laions soǵystyń "(turǵyndar arasyndaǵy) qantógisti odan saiyn ýshyqtyratyn jáne surapyl shielenis kezeńine" engeni týraly BUU Qaýipsizdik Keńesin qulaǵdar etken.
