Qostanai oblysynyń qylmystyq ister boiynsha Sot alqasy «Tulpar-Talgo» poiyzynda bolǵan oqiǵaǵa bailanysty apelliatsiialyq shaǵymdardy qarady, dep habarlaidy "Ult aqparat" oblystyq sottyń baspasóz qyzmetine silteme jasap.
Qostanaidyń №2 qalalyq sotynda burynǵy jolserikter Qolqanat Qurmaniiaz ben Jetes Úmbetálievke shyǵarylǵan úkim qaita qaralyp, ózgerissiz qaldy. Sot qylmyskerlerdiń qorǵaýshylarynyń shaǵymdaryn qarady.
«Qostanai qalalyq №2 sotynyń úkimimen № 6 vagondaǵy jolaýshyny zorlaǵan Q. Qurmaniiaz ben J. Úmbetáliev QR QK 120-baby boiynsha kináli dep tanylyp, árqaisysy 5 jylǵa bas bostandyǵynan aiyryldy. Sot alqasy qabyldanǵan sheshimniń negizdiligi men zańdylyǵyna bailanysty birinshi satydaǵy sottyń úkimimen kelisti. Sottalýshylardyń kinási jábirlenýshiniń aiǵaqtarymen dáleldendi. J. Úmbetaliev aldyn ala qylmys jasaý orny men jaǵdailaryn daiyndap, kýpedegi basqa adamdardy shyǵaryp jibergen. Jábirlenýshiniń aiǵaqtary sotta jáne sot tergeýi boiy turaqty boldy, is materialdarymen, saraptama qorytyndysynyń nátijelerimen tolyq sáikes keledi. Jolserikterge jaza istiń barlyq mán-jailaryn eskere otyryp, baptyń sanktsiiasy sheginde taǵaiyndalǵan», - dedi oblystyq sottyń baspasóz qyzmetindegiler.
Eske sala keteiik, «NeMolchiKZ» qoǵamdyq qorynyń basshysy Dina Smailovanyń Facebook paraqshasynda jazýynsha, 26 qyrkúiek kúni keshki saǵat 10-dar shamasynda boijetken «Talgo» poiyzynyń kýpesine otyrady. Kýpe ishinde bir er adam bolǵan. Zattaryn qoiyp, poiyz meiramhanasynyń ashanasynan tamaqtanyp kelnen kezinde kýpe ishinde arnaiy forma kimegen jolserik otyrady. Ol áýelgi er adamdy basqa kýpege aýystyryp jibergenin aitady. Qyz uiqysy kelgenin túsindirip, jolserikten kýpeden shyǵýyn ótinedi. Syra iship otyrǵan jolserik tek jarty saǵattan soń shyǵyp ketken. Alaida tańǵy saǵat 04:00 shamasynda jolserik boijetken jatqan kýpege óz kilti arqyly ashyp kiredi. Munan soń aram oiyn iske asyrady. Izinshe ekinshi jolserik te kelip, boijetkendi zorlaǵan.
