"Qazaqstan temir joly" ulttyq kompaniiasy zorlanǵan jolaýshydan keshirim surady. Bul týraly "QTJ" UK" AQ basqarma tóraǵasynyń birinshi orynbasary Qanat Álmaǵambetov aitty, dep habarlaidy Sputnik Qazaqstan.
Kompaniia ókiliniń aitýynsha, Talgo jolserikteriniń áreketinen jolaýshy áiel zardap shegip qana qoimai, "QTJ" bedeline nuqsan kelgen.
"Mundai jaǵdaidyń bolǵany óte ókinishti. Sondyqtan kompaniia jáne ózimniń atynan keshirim suraimyn. Men jolserikter mundai áreketke barmaý kerek edi dep sanaimyn. Olar jolaýshynyń qaýipsizdigine jaýap berýdiń ornyna, qylmys jasady. Saldarynan jolaýshy ǵana zardap shegip qoimai, bizdiń jolserikterdiń, qyzmetkerlerdiń bedeline nuqsan keldi. Bizdiń oiymyzsha, olar sottalýy tiis", - dedi Qanat Álmaǵambetov baspasóz máslihatynda.
Sonymen qatar basqarma tóraǵasynyń birinshi orynbasary qoǵam nazaryna ilikken oqiǵadan soń, "Nur-Sultan-Aqtóbe" poiyzyna qatysy bar qyzmetkerler túgel jumystan shyǵarylǵanyn atap ótti.
Jurttyń jaǵasyn ustatqan oqiǵa
2018 jyldyń qarasha aiynda "NeMolchiKZ" zorlyq-zombylyqqa qarsy qoǵamdyq qozǵalys" qorynyń basshysy Dina Tańsári (Smaiylova) jantúrshigerlik oqiǵa týraly jazdy.
Onyń aitýynsha, elordadaǵy ǵylymi konferentsiiadan Aqtóbege qaityp bara jatqan áieldi "Tulpar-Talgo" poiyzynda eki jolserik birinen soń biri zorlaǵan.
Sýdia bul oqiǵany jabylyp zorlaý deýdiń ornyna "ádettegi áiel zorlaý" dep baǵalady.
Keiin 29 shilde bas kólik prokýrory Ernat Sybanqulov, jolserikterge shyǵarylǵan sot úkimi qaita qaralatynyn málimdedi.
