Qazaqstan Respýblikasy Mádeniet jáne sport ministrliginiń tapsyrysy boiynsha "Adigýl prodakshn" kinokompaniiasynyń qatysýymen Sh.Aimanov atyndaǵy "Qazaqfilm" AQ túsirgen "Bizdiń qalanyń hanzadasy" kórkem filmi 19 qazannan bastap prokatqa shyqty, - dep habarlaidy "Ult aqparat" kinostýdiia baspasóz qyzmetine silteme jasap. Rejisseri ári stsenarii avtory - Qazaqstannyń halyq artisi - Talǵat Temenov.
"Adamdar arasyndaǵy bóltirik", "Qyzǵysh qus", "Mahabbat beketi" syndy filmderimen kórermenge jaqsy tanys Talgat Temenovtyń jańa kinotýyndysy jalǵyzdyqtyń kúiin keship júrgen balalar úiiniń 6 jasar tárbielenýshisi men qarttar úiiniń ardageri arasyndaǵy dostyǵy týraly baiandaidy.
"Bizdiń qalanyń hanzadasy" - bul Bibol esimdi erekshe bala men mýzykant Qasymhan esimdi qariia týraly áserli oqiǵa. Filmniń negizgi jelisi - bala men qarttyń kezdeisoq kezdesýi bolyp tabylady. Bul filmdegi dramatizm bir-birine múlde bóten bas keiipkerlerdiń sońynda etene jaqyn bolyp ketýleri. Film - adamnyń adamgershilik qasietteriniń arqasynda ǵana shyn baqytqa jetýge bolatynyn kórsetedi.
Filmniń túsirý jumystary Astanada jáne Aqmola oblysynyń Býrabai aýylynda ótti. Basty rólderdi Anýar Toleýgajy jáne QR eńbek sińirgen qairatkeri Tóleýbek Aralbai ("Jaýjúrek Myń Bala", "Joiýshy", "Tyǵyryqtan jol tapqan") somdady. Sonymen qatar, filmge Q.Qýanyshbaev atyndaǵy Qazaq mýzyka jáne drama teatrynyń (Astana qalasy) akterleri túsken.
Eske salaiyq, "Bizdiń qalanyń hanzadasy" filminiń tusaýkeseri (jumys ataýy "Bibol") biyl 1 maýsymda, Halyqaralyq balalardy qorǵaý kúnine orai Astana qalasynda ótken bolatyn. Sonymen qatar, atalmysh kinotýyndy qyrkúiek aiynda Reseide ótken II Halyqaralyq "Eýraziialyq kópir" kinofestivaliniń negizgi baǵdarlamasy sheńberinde kórsetildi.
Qazaqstandyqtar "Bizdiń qalanyń hanzadasy" filmin búgin - 19 qazannan bastap elimizdiń kinoteatrlarynan kóre alady.
