Q.Qýanyshbaev atyndaǵy Memlekettik akademiialyq qazaq mýzykalyq drama teatrynyń kórkemdik jetekshisi Talǵat Temenov atalmysh teatrǵa «ulttyq» ataǵyn berýdi surady, dep habarlaidy QazAqparat.
«Bizde qazirgi tańda 60 qana akter bar. Jańa shtat alǵannan keiin akterlardyń sany 150 bolady. Jalpy, kúnine teatrǵa jumysqa 400 adam keldi degen kúnde, kem degende 250-i kóligimen jetedi. Sondyqtan, parking jaǵyn oilastyrsaq... Qazir bizde bir spektaklge tórt-aq million teńge ketedi. «Astana-Operada» bir spektaklge 330 mln teńge jumsalady. Aldaǵy ýaqytta ár spektaklge bizge 70-80 mln teńgeden berip tursa – bizde eki zal bar. Iaǵni, Mádeniet jáne sport ministrligimen birge osy máselege nazar aýdarsaq», - dedi Talǵat Temenov Prezidenttiń kómekshisi Máýlen Áshimbaevpen birge teatrdyń jańa ǵimaratynyń qurylys barysymen tanysý kezinde.
Ol sonymen birge, Qazaq drama teatryna «ulttyq» dárejesin berýdi usyndy.
«Eýropa elderindegi teatrlardyń barlyǵy - ulttyq. Bizde Qazaqstanda ulttyq teatr joq. Eger osyny Qazaq ulttyq drama teatry desek, keremet bolar edi. Sonda biz basqa memleketter sekildi ulttyq teatr bolamyz», - dedi Talǵat Temenov.
Teatr ujymynyń sózin tyńdaǵan Prezidenttiń kómekshisi Máýlen Áshimbaev osy ótinishterdiń bárin de toptap, usynys retinde tapsyrýdy surady.
Eske sala ketsek, búgin Prezidenttiń kómekshisi Máýlen Áshimbaev Nur-Sultanda salynyp jatqan Qazaq drama teatry ǵimaratynyń qurylysymen tanysqan bolatyn.
«Kelesi jyly 6 shildede teatr ujymy óziniń qonys toiyn toilaidy dep senemiz», - dedi Máýlen Áshimbaev.
