Muǵalimderge qazir oqýshynyń nazary úshin úlken básekege túsýge týra keledi.
Ortalyq kommýnikatsiialar qyzmetiniń direktory, saiasattanýshy Talǵat Qaliev Ustazdar kúnine orai osyndai pikir bildirip, muǵalimderdi kásibi merekesimen quttyqtady, dep habarlaidy QazAqparat tilshisi.
«Bilim alǵan, alaida bilimdi dep aitýǵa aýyz barmaityn adamdardy kórip júrmiz. Iaǵni, bilim alý degen – oqýmen shektelmei, etikalyq jáne moraldyq qasietterdi sińirýmen eseptelse kerek. Osynyń bári ainalyp kelgende muǵalimge bailanysty. Tarihty paraqtap otyrsańyz, kez kelgen uly adamnyń tulǵa bolyp qalyptasýyna muǵalimniń tikelei sebep bolǵanyn kóresiz. Bolmasa buǵan qarsy oqiǵalar da bar: máselen, kezinde Edisondy (ónertapqysh) muǵalimderi baiqamai qap, aqyry mektepten qýylǵan bala álemdik tulǵanyń birine ainaldy. Al qazir zaman bólek. Muǵalim qazir internetpen bir, tyǵyz kún tártibimen bir kúresýi kerek», - dedi sarapshy Ustazdar kúnine arnalǵan «Prezident Qasym-Jomart Toqaevtyń Qazaqstan halqyna Joldaýy: muǵalimniń áleýmettik rólin arttyrý aspekti» taqyrybynda ótken dóńgelek ústelde .
Saiasattanýshynyń aitýynsha, qazir aqparattyq maidan kezeńinde adam bilimdi izdemeidi, bilimniń ózi adamdy izdeitin ýaqyt kelgen.
«Sol úshin pedagogtarǵa oqýshynyń nazary úshin úlken básekege túsýge týra keledi. Buryn uzaq ýaqyt igeretin bilim qazir sanańyzǵa sap etip, bir kúnniń ishinde keledi. Sol úshin biz muǵalimge ýaqyt berýimiz kerek. Sebebi, ol – shyǵarmashylyq adamy. Bir ýaqytta árbir balaǵa jeke bilimdi sińiretindei amal-ádis tabý úshin muǵalim baryn salýy tiis. Ustazdardy kásibi merekesimen quttyqtaimyn», - dedi ol.
Eske sala ketsek, osydan biraz ýaqyt buryn Úkimet otyrysynda «Pedagog mártebesi týraly» zań jobasy bekitilgen bolatyn.
Qazirgi ýaqytta zań jobasy Parlament Májilisiniń qaraýynda jatyr.
