Foto: © Sputnik / Aidana Daiyrova
Almaty oblysynda kóz jumǵan 2 jasar búldirshinniń anasy qaiǵyly jaǵdaidyń mán-jaiyn aityp berdi, dep habarlaidy Sputnik Qazaqstan tilshisi.
Oqiǵa 25 naýryzda Talǵar aýdanyndaǵy Jańalyq aýylynda bala baǵýshy áieldiń úiinde bolǵan.
Altynai Qiymbaeva aýysymmen jumys isteidi. Bes jáne 2 jasar búldirshinderin bala baǵýshyǵa qaldyryp ketip júrgenine bir jarym ai bolǵan.
"Jumysta júrgenimde bala baǵýshy qońyraý shalypty, men ony estimei qalyppyn. Sosyn ózim habarlasyp edim, "tez kelshi, seniń balań talyp jatyr" dedi. Júgirip kelsem, balam tabaldyryqta jatyr, erni kógerip, qaitys bolyp ketipti. Surasam, eshkim eshnárse aitpaidy", - deidi ol.
Bala kútýshi tek politsiia men prokýratýra kelgende ǵana mán-jaidy aitqan.
"Úsh jasar qyzym qylqyndyryp, aýa jetpei qaldy. Men "basqa bólmege shai qoiýǵa shyǵyp ketip edim, kelsem óstip jatyr" deidi. Ol názik kishkentai qyz. Ol qylqyndyrdy degenge senbeimin. Máiithanada balanyń jelke tusy qantalaǵanyn aitty. Sodan keiin kúdiktenip qaldym", - deidi búldirshinniń anasy.
Bala kútýshiniń óziniń 3 balasy bar, tórtinshisine júkti. Altynai onymen buǵan deiin shái desip kórmegen. Balalaryn qarap bergeni úshin aiyna 65 myń teńge tólegen. Bala kútýshiniń ata-anasy kelip Altynaidan keshirim suraǵan, al kúdikti bir de bir ret qarasyn kórsetpegen.
"Shyndyqty aitýdyń ornyna balań aýrýshań dep jatyr. Balam sap-saý bala bolǵan. Álsiz emes. ROVD men kezekshi prokýratýra kúdiktini on kún qamaýǵa aldyq, odan ary ustai almaimyz, dálel az dep shyǵaryp jiberipti. Kúdikti qamaýdan shyǵyp ketti degendi aýyldaǵylardan estidim. Túngi saǵat 23:00-den 03:00-ge deiin politsiiada júrdik. Eshkim bizben sóilespedi, jolatpady. Jýrnalister kirisip edi, búgin qaitadan qamap qoiypty", - deidi Altynai Qiymbaeva.
Almaty oblystyq politsiia departamenti kúdiktini qamaý nemese shyǵarý týraly sheshim shyǵara almaityndaryn, ony tek oblystyq prokýratýra sheshetinin aitty. Al oblystyq prokýratýra kúdiktini bir kúnde shyǵaryp, bir kúnde qaita qamaǵan.
"25 naýryzda bul fakt Qazaqstan Qylmystyq kodeksiniń 141-baby 2-bólimi boiynsha tirkeldi. 2023 jyldyń 26 naýryzynda qylmystyq quqyq buzýshylyqty QR QK 141-babynyń 2-bóliginen 99-babynyń 3-bóligine qaita saralaý týraly sheshim qabyldandy", - dep málimdedi Almaty oblysy prokýratýrasynyń baspasóz hatshysy Maqsat Abirov.
6 sáýirde Talǵar aýdany PB tergeýshisi aýdan prokýratýrasyna eki ai merzimge qamaýda ustaý túrindegi bultartpaý sharasyna sanktsiia berý týraly ótinish joldaǵan.
Qazirgi ýaqytta sotqa deiingi tergeý jalǵasyp jatyr.
