Foto: ashyq derekkóz
20 jastaǵy Nigina Djagiparova 10 qańtar kúni tańǵy saǵat 05:00 shamasynda ózin nashar sezingendikten Talǵar ortalyq aýdandyq aýrýhanasyna barǵan. Alaida dárigerdiń qabyldaýynan úiine oralǵan soń bir saǵattan keiin kóz jumǵan, dep habarlaidy Ult.kz "Eýraziia" arnasyna silteme jasap.
Nigina Djagiparova tańǵy ýaqytta kenetten keýde tusy aýyryp, apasymen berge aýrýhanaǵa meditsinalyq kómek alýǵa barǵan. Týystarynyń aitýynsha, dárigerler qyzdy teksergen. Analiz alyp, kardiogramma men rentgenge túsirgen. Meditsina qyzmetkerleriniń qoiǵan aldyn ala diagnozy – oshaqty pnevmoniia.
"Sistema saldy, biraq jaǵdaiy jaqsarmady. "Sizderdi jatqyza almaimyz" dedi. Teksergen joq, ol qyz otyrǵan da joq, aýyrsyný da ketpedi. Eshteńe istei almaimyz dedi. Olar qalai qyzdy aýrýhanadan jibere saldy? Ony ne sebepti jibergenin bilgimiz keledi", – dep bolǵan jaidaidy baiandady marqumnyń ápkesi Natalia Poplavskaia.
Naýqastyń jaǵdaiyna qaramastan ony dárigerler baqylaýǵa almai, pýlmonolog dárigerge jibergen. Nigina apasymen úiine qaityp ketken. Biraq úige kelgen soń araǵa bir saǵattai ýaqyt ótkende qyz kóz jumǵan.
Marqumnyń týystary dárigerler qyzdyń jaǵdaiyn kórip turyp, ne sebepti úige qaitaryp jibergenin túsinbei dal. Olar Nigina dárigerlerdiń baqylaýynda bolǵanda aman qalýǵa bolatyn edi dep otyr.
"Ol maǵan habarlasyp, "aǵa, kómektesińizshi" dedi. Bul onyń maǵan aitqan sońǵy sózderi edi. Men jienimniń máiitin kórýge keldim. Myna qaǵazdardyń qabyldaý bóliminen shyǵartyp aldym. Qyzǵa tek bir "pýlmonologqa bar" degen qaǵaz bergen", – deidi Niginanyń naǵashy aǵasy Rahimjan Mýsarov.
Naginaǵa jaqynda turmys qurýǵa usynys jasaǵan. Ol jańa ómirge qadam basýǵa, toiǵa daiyndalyp júrgen.
Niginanyń jaqyndary istiń jan-jaqsy tergelýin talap etip otyr. Sondai-aq quqyq qorǵaý organdaryna aryz túsirgen. Deneni soiyp tekserdi. Sot-meditsinalyq saraptama da taǵaiyndalǵan. Týystary teýelsiz sarapshyǵa da júgingen.
Talǵar ortalyq aýdandyq aýrýhanasyndaǵylar qyzdyń analizderi jaqsy deidi. Al oshaqty pnevmoniia ómirge qaýipti diagnozdyń qataryna jatpaidy dep otyr. Meditsinalyq mekeme basshysynyń aitýynsha, qyzdyń apasy nemeresimen úige baryp, aýrýhanaǵa jatqyzý úshin qaita qaityp keletinin aitqan. Onyń bul ýádesinen keiin dáriger bas tartý hatyn almaǵan.
"Aǵasyna birneshe ret túsindirip aittym. Analizde bári durys. Muny ol teýelsiz sarapshyǵa da teksertti. Naýqas ýlansa em aǵzany tazalaý úshin júrgiziledi. Apasy dárigerdiń keńesinen keiin úiine qaityp, keiin qaita keletinin aitqan. Sondyqtan dáriger odan bas tartý hatyn almaǵan", – deidi Talǵar ortalyq aýdandyq aýrýhanasynyń emdeý isi jónindegi direktordyń orynbasary Ǵalymjan Esenaliev.
Osyǵan qatysty Almaty oblysy politsiia basqarmasyna suraý joldadyq. Vedomstvonyń málimetinshe, 20 jastaǵy qyzdyń óliminen keiin qylmystyq is qozǵalǵan.
"Qazir oqiǵanyń barlyq mán-jaiyn tolyq, jan-jaqty jáne obektivti túrde anyqtaý úshin tergeý is-sharalary kesheni júrgizilip jatyr. Sonymen qatar sotqa deiingi tergep-tekserý aiasynda meditsinalyq qyzmetkerlerdiń meditsinalyq kómekti tiisinshe kórsetpeý deregi boiynsha áreketterine tiisti tekserý júrgiziledi", – dep málimdedi politsiia departamenti.
Sotqa deiingi tergeý jalǵasyp jatyr.
