Foto: kris_p_talgar
Almaty oblysy Talǵar aýdanynda kókpar uiymdastyrǵandar 10 táýlikke qamaýǵa alyndy, - dep habarlaidy Tengrinews.kz agenttigi.
Almaty oblysy PD baspasóz qyzmeti málimetinshe, kókparshylar qoǵamdyq tártipti buzyp qana qoimai, kólikterdiń júrýine kedergi keltirip, júrgizýshilerge qaýip tóndirgen.
"Qazirgi ýaqytta politseiler at oiynyn uiymdastyrýshylar men qatysýshylardyń birqataryn anyqtady. Olar ákimshilik zańnama normalaryna sáikes "Usaq buzaqylyq", "Jol júrisi qaǵidalarynda kózdelgen jolaýshylar men júkterdi tasymaldaý jónindegi talaptardy saqtamaý" jáne "Kólik quraldarynyń júrýine kedergi jasaý" baptary boiynsha jaýapkershilikke tartyldy. Sot uiymdastyrýshyǵa jáne basqa da qatysýshylarǵa qatysty usaq buzaqylyq jasaǵany úshin 10 táýlik merzimge ákimshilik qamaýǵa alýǵa sanktsiia berdi", - dedi oblystyń Politsiia departamenti ókilderi.
Vedomvstvo halyq densaýlyǵy men qaýipsizdigine qaýip tóndirmeý úshin ulttyq sport oiyndaryn jergilikti atqarýshy organdarmen kelise otyryp, ippodromdarda, arnaiy bólingen oryndarda ótkizý kerek ekenin jáne ony uiymdastyrýshylar qatań baqylaýda ustaý keregin eske saldy.
Eske salaiyq, Almaty irgesindegi qala turǵyndary kókparshylardyń áreketine narazy bolǵan edi. Kýágerlerdiń aitýynsha, olar Talǵar kóshelerinde kókpar tartqan.
