Tian-Shan taýlarynda bir top sheteldik saiahatshy adasyp ketti. Bul jaiynda QR IIM Tótenshe jaǵdailar komitetinen málim etti, dep habarlaidy "Ult aqparat".
Vedomstvonyń málimetinshe, 11 qyrkúiek kúni tańerteń bir top sheteldik saiahatshy Talǵar asýyna joryqqa shyǵyp, Týrist asýy arqyly tómen túsýge niettengen. Polshanyń 4 adamynan jasaqtalǵan topqa Tian-Shan taýyna saiahattaýda esh tájiribesi joq Ýkraina azamaty jol nusqaýshy bolǵan. Saiahatshylar Alpi raýshany alańqaiy aýdanyna jetken kezde qar jaýyp, súrleý jol kórinbei qalady. Kishi Talǵar asýyna jetken olar qardan sýsymaly batpaqqa ainalǵan soqpaqpen joǵary órlep shyǵa almaǵan. Osydan keiin sheteldikter burynǵy baǵdaryna qaita túsip, selden qorǵaý beketine jetken. Alaida ol jerden tiri jandy kezdestire almaǵan saiahatshylar qutqarýshylarǵa habarlasqan.
«Saǵat 14-00-de TJK Respýblikalyq jedel qutqarý jasaǵynyń kezekshiligine sheteldikterdi asýdan tómen túsirýge kómek qajettigi týraly aqparat tústi. Jedel top bara jatqan kezde telefon arqyly adasqan adamdarǵa keńes berildi, olardyń boljamdy turǵan jeri anyqtaldy. Mundai jaǵdaida jergilikti jer bederi men aýa raiyn eskere otyryp, Býtakovka asýyna qarai jyljý qajettigi túsindirildi. Sheteldikterge qardyń az jaýǵanyna qaramastan kóshkin júrý qaýpi bar ekendigin aitylyp, barynsha abailap júrý kerektigi eskertildi» delingen taratylǵan aqparatta.
Al bul ýaqytta qutqarýshylar adasyp ketken sheteldikterge qarama-qarsy bara jatqan edi. Saiahatshylarmen bailanysyp otyrǵan kezekshi dispetcher qutqarýshylardyń baǵdaryn da úilestirip, nátijesinde saiahatshylar tabyldy. Sheteldikterdiń eshqaisysyna meditsinalyq kómek qajet bolmady. Qutqarýshylar olardy din aman qalaǵa jetkizdi.
