Taldyqorǵanda politsiia qyzmetkerleri jol qozǵalysy qaýipsizdigine eleýli qaýip tóndirgen zań buzýshylyqtyń jolyn kesti., dep habarlaidy ult.kz.
Qonaev kóshesinde patrýldeý kezinde tártip saqshylary CHANGAN EADO markaly avtokólikti toqtatqan. Tekserý barysynda rólde otyrǵan 18 jastaǵy jergilikti turǵynnyń kólik júrgizý quqyǵy joq ekeni anyqtaldy. Sonymen qatar meditsinalyq kýálandyrý onyń alkogoldik masań kúide bolǵanyn kórsetti.
Tekserý kezinde kólik iesiniń de jaýapkershilikke tartylatyny belgili boldy. Ol avtokólikti júrgizýshi kýáligi joq ári masań kúidegi azamatqa basqarýǵa bergen. Budan bólek, kólik iesiniń ózi de alkogoldik ishimdik ishken kúide bolǵan.
Atalǵan faktiler boiynsha ákimshilik materialdar rásimdeldi. Zańǵa sáikes, masań kúide jáne júrgizýshi kýáliginsiz kólik basqarǵan azamatqa 20 táýlikke ákimshilik qamaý jazasy qarastyrylǵan.
Al kólik iesine kólik quralyn masań ári júrgizýshi kýáligi joq adamǵa bergeni úshin 15 táýlikke ákimshilik qamaý jáne 7 jyl merzimge kólik júrgizý quqyǵynan aiyrý jazasy kózdelgen.
Jetisý oblysynda jyl basynan beri masań kúide kólik basqarýdyń 212 deregi anyqtalǵan. Onyń 43-i júrgizýshi kýáligi joq azamattarǵa qatysty bolǵan.
Politsiia ókilderi mas kúide kólik júrgizý aýyr jol-kólik oqiǵalaryna sebep bolyp, adam ómirine qaýip tóndiretinin eskertip, zań buzýshylarǵa qatań shara qoldanylatynyn málimdedi.
