Taldyqorǵan qalasynyń soltústik shyǵysynda 17 gektar aýmaqta tálimbaq ósirý qolǵa alynyp, qazir munda kók shalǵyn shóp, japyraqty jáne qylqan japyraqty aǵashtardyń jáne basqa da jasyl jekektiń túr-túri ósirile bastaǵan. Qurylǵanyna bir jyl endi ǵana bolǵan «Kórkem-Taldyqorǵan» tálimbaǵy bolashaqta óndiristik jylyjai salynyp, tamshylatyp sýarý tehnologiiasy da engiziletin bolady. Bul týraly búgin Almaty oblysynyń ákimi Amandyq Batalovtyń oblys ortalyǵynyń nysandaryn aralaýy barysynda belgili boldy, dep habarlaidy "Ult aqparat" oblysy ákimdiginiń baspasóz qyzmetine silteme jasap.
Tálimbaq aýmaǵynan Tian-Shan shyrshasy, qaiyń, qaraǵai, usaq japyraqty jóke, úshkir japyraqty úieńki jáne basqa da túrli aǵashtardyń alqabyn kezdestirýge bolady. Atalmysh nysannyń agronomy Seiithan Baibuqashevtyń aitýynsha, ázirge munda 15 jumysshy eńbek etedi. Aldaǵy ýaqytta jumysshylar sanyn arttyrýǵa qajettilik týyndap otyr. Qazirgi kezde 5 tehnika satyp alynǵan, qajetti tehnika qataryn áli de tolyqtyrmaq niette.
Oblys ákimi A. Batalov tálimbaqtyń bos jatqan jeri bolmaýy kerektigin, árbir sharshy metr tiimdi qoldanylýy qajettigin eskertti. Aldaǵy ýaqytta barlyq ósimdikter men aǵashtardy qutyda ósirse, ony tiisti jerge jóneltýde de qolaily bolmaq.
- Osyǵan deiin Taldyqorǵan qalasyn kógaldandyrý isine qajetti kók óskinniń bári de syrttan satyp alynatyn. Endi qala óz aýmaǵyn ózi ósirgen jasyl jelekpen kómkerýge múmkindigi bar. Bul birinshiden, qarjy shyǵynyn azaitsa, ekinshiden, óz tálimbaǵymyzdy damytýǵa biz barlyq jaǵdaidy jasap otyrmyz. Endigi jerde óndiristik jylyjai salýǵa jáne intensivti tehnologiiamen tamshylatyp sýarýdyń eń sapaly júiesin ornatyp, onyń tiimdi jumys isteýine qajetti qarjyny da qarastyratyn bolamyz, - dedi A. Batalov.
Osy kúni oblys basshysy qalada qurylysy júrip jatqan drama teatr, Saltanat saraiynda boldy. Qalaǵa kireberistegi 3-bólimsheniń kóshelerin retteý jumystarymen tanysty. Qala ákimdigi qurylys normalarynyń saqtalýyn qadaǵalamaýy saldarynan turǵyn úilerdiń retsiz salynýy oryn alǵan. Munda jalpy 463 ýchastok bolsa, sonyń 153-inde qurylys júrip jatyr. Oblys ákimi A. Batalov az ýaqyttyń ishinde 3-bólimshe kóshelerin retke keltirýdi qatań tapsyrdy. Jańa kelbettegi kireberis arkanyń ornalasatyn ornyn da belgilep berdi.
«Ǵaryshker» shaǵyn aýdanyndaǵy 15, 16, 17 turǵyn úilerdiń aýlasyndaǵy balalar alańynyń jańartylǵan keipin kórip, turǵyndarmen áńgimelesti. Oryndyqtardyń, ýrnalardyń, balalardyń oiyn karýselderiniń, jalpy aýlanyń abattandyrylýy sapasyz jasalǵanyn synǵa alǵan ákim jumystardy qaita júrgizýdi tapsyrdy.
Sonymen qatar Ortalyq saiabaqtaǵy, qalalyq bassein aýmaǵyndaǵy qurylys jumystaryn kórdi. Qalany gazdandyrý barysymen tanysty. Istiń qarqyny kóńil tolarlyq emes ekenin atap aitty. Qorytyndysynda qaladaǵy barlyq qurylys nysandaryna, kórkeitý, abattandyrý, gazdandyrý jumysyna baqylaý júrgizý úshin birinshi orynbarasy L. Turlashov pen qala basshylyǵyna ár senbi saiyn qalany aralap, jumystyń kestege sai, ári sapaly jasalyp jatqanyn qadaǵalap otyrýdy tapsyrdy.
