Tabiǵi gazǵa qosylýǵa qatysty pikirimen qalanyń Panfilov kóshesinde turatyn Nikolai Biller esimdi azamaty bólisti. Qazirgi ýaqytta onyń jer úiiniń aýlasynda qurylys-montajdaý jumystary júrgizilip jatyr, dep habarlaidy "Ult aqparat" oblysy ákimdiginiń baspasóz qyzmetine silteme jasap.
Januia otaǵasynyń aitýynsha, onyń otbasy alǵashqylardyń biri bolyp, tabiǵi gazǵa qosylý týraly sheshim qabyldaǵan.
- Meniń otbasym qalaǵa tabiǵi gazdyń kelgendigi týraly habardy estigende óte qatty qýandy. Qazir meniń kórshilerim de gaz júiesine qosylýda. Gaz bizder úshin bir jaǵynan yńǵaily bolsa, ekinshi jaǵynan óte tiimdi. Meniń esepteýim boiynsha úiime deiin tartylatyn gaz qubyrynyń uzyndyǵy 20 metrden asyp ketýine bailanysty barlyq jumystarǵa 125 myń teńge ǵana jumsaidy ekenmin. Jylytý qazandyǵyna qatysty aitar bolsam, turǵyn úiim jaily, jyly ári turýǵa qaýipsiz bolýy úshin, basymdyqty birinshi kezekte jylytý júiesiniń sapasyna aýdaramyn. Al bólip tóleý múmkindiginiń bary men úshin óte yńǵaily boldy, - dep atap ótti Nikolai.
«QazTransGaz Aimaq» AQ Jetisý óndiristik filialy direktorynyń orynbasary Baýyrjan Dúisenov habarlaǵanyndai, Taldyqorǵan qalasyn gazdandyrý 4 kezeńge jáne 22 gaz berý keshenderine bólingen. 1-kezeńniń ózi 6 gaz berý keshenine bólinedi. Búgingi kúni biýdjet qarajaty esebinen joǵary, orta jáne tómen qysymdy 88 shaqyrym gaz qubyry júiesi júrgizilgen jáne 2 myńǵa jýyq jer úi men 2 myńǵa jýyq kópqabatty turǵyn úilerdiń páterlerine gaz qubyry tartylǵan. Osylaisha, gaz júiesimen qamtylǵan abonentter aǵymdaǵy jyldyń ózinde-aq tabiǵi gazǵa qosylý múmkindigine ie boldy. Qazirgi ýaqytta kúnine 5-6 abonent tabiǵi gazǵa qosylý týraly ótinishimen júginýde.
Sondai-aq, «QazTransGaz Aimaq» AQ Jetisý óndiristik filialy tarapynan jeke menshik turǵyn úilerdi gazdandyrýdy júrgizip jatqandyǵyn atap ótti. Búgingi kúnde 58 abonent qosylýǵa tolyqtai daiyn, onyń ishinde joǵaryda atap ótken Nikolai Biller de bar.
B.Dúisebekovtiń sózine súiener bolsaq, 1 tekshe metr tabiǵi gazdyń quny 33,6 teńgeni quraidy. Máselen, úidiń ishki aýdany 100 sharshy metrdi quraidy dep eseptesek, jylytý maýsymy kezinde turǵyn úidi tabiǵi gazben jylytý úshin ortasha eseppen 70-80 myń teńge jumsalady. Al qosylýǵa qatysty esebin shyǵaratyn bolsaq, barlyq qurylys-montajdaý jumystarymen qosa gaz qubyrynyń uzyndyǵy 20 metr bolǵan jaǵdaida, ár abonent úshin 98 myń teńgeni quraityn bolady. Bul somanyń ishine jylytý qazandyǵy kirmeidi. Qazandyqtyń quny 70 myń teńgeden bastalady da, onyń baǵasy óndirýshi firmaǵa, úidiń aýdanyna jáne qosymsha múmkindikterine bailanysty ár túrli bolady. Máselen, aǵyndy sý jylytý múmkindigi bar jylytý qazandyǵyn ornatqan jaǵdaida, qazandyqty sý júiesine qosý arqyly, abonent óz úiinde kúndelikti ystyq sýdy tutyný múmkindigine ie bolady.
Qala turǵyndary gaz júiesine qosylýmen qatar jylytý qazandyǵyn qosa satyp alǵan jaǵdaida «QazTransGaz Aimaq» AQ Jetisý óndiristik filialy 3 aidan 6 aiǵa deiingi paiyzsyz bólip tóleý múmkindigin usynady.
