© Sputnik / Abzal Kaliev
Taldyqorǵanda jataqhana komendanty stýdentterdiń atyna 14,7 mln teńge nesie rásimdegen. Alaiaqtyq faktilerin anyqtaýǵa jergilikti blogerler kómektesti, dep habarlaidy Sputnik Qazaqstan agenttigi oblystyq politsiia departamentiniń baspasóz qyzmetine silteme jasap.
Jábirlenýshilerdiń aitýynsha, stýdentter jataqhanasynyń 41 jastaǵy komendanty aldymen naýqas ulyn jeleý etip kómek suraǵan. Sońynan olardy aldap, úlken somaǵa taýarlyq nesie alýǵa májbúrlegen.
Politsiia kúdiktiniń ustalǵany týraly aqparatty rastady. Politsiia Qylmystyq kodekstiń 190-baby (alaiaqtyq) boiynsha is qozǵalǵanyn habarlady.
"11 qazanda kúdikti ustalyp, qalalyq politsiiaǵa aiǵaq berý úshin jetkizildi. Tergeý barysynda zardap shekken 10 stýdent pen 2 jataqhana qyzmetkeriniń ótinishteri bar. Jábirlenýshilerge keltirilgen jalpy shyǵyn 14,7 mln teńgeden asady", – dep habarlady oblystyq politsiianyń baspasóz qyzmeti.
Komendant stýdentterge ekinshi deńgeili birneshe bankten alaiaqtyq jolmen taýarlyq kredit aldyrǵan. Al óz qyzmetkerlerine – internet-qosymshalardy paidalana otyryp, aqshalai kreditter resimdetken.
Kúdikti aiǵaqtar berýden bas tartty jáne densaýlyǵynyń kúrt nasharlaýyna bailanysty qazir aýrýhanada jatyr. Isti tergeý oblystyq politsiia departamentiniń baqylaýyna alyndy. Komendanttyń basqa da zań buzýshylyqtarǵa qatysy bar-joǵy anyqtalyp jatyr.
