Qarý qoldanyp, erli-zaiyptyny jaralady degen 24 jastaǵy kúdiktini Jetisý oblysynyń politsiia qyzmetkerleri ustady, dep habarlady Sputnik Qazaqstan vedomstvonyń baspasóz qyzmetine silteme jasap.
Oqiǵa segizinshi maýsym kúni Eskeldi aýdanynyń Qońyr aýylynda boldy. Jas jigit 34 jastaǵy jergilikti turǵyn jáne onyń áielimen janjaldasyp, urys sońy tóbeleske ulasqan.
Vedomstvo málimetinshe, kúdikti erli-zaiyptyǵa 12 kalibrli ańshylyq myltyqtan oq atqan.
Onyń Mitsubishi Pajero kóliginde qarý alyp júrgeni anyqtaldy. Zardap shekkender Taldyqorǵan aýrýhanalarynyń birine jatqyzyldy.
Janjalǵa sebep kúdiktiniń aýyl kóshesinde kólikpen joǵary jyldamdyqpen júrip, shańdy kótergeni belgili boldy. Bul jergilikti turǵyndardyń narazylyǵyn týdyrdy.
Oǵan eskertý jasalǵanymen, ol jaýap retinde janjal shyǵaryp, atys qarýyn qoldandy.
"34 jastaǵy er adam men 31 jastaǵy áiel jaraqat aldy. Ekeýi de aýrýhanaǵa jetkizildi. Qylmystyq tergeý qylmystyq kodekstiń 99-baby boiynsha 24-babyn qoldana otyryp júrgizilýde. Iaǵni "adam óltirýge oqtalý", - dep habarlady oblystyq politsiia departamentiniń baspasóz qyzmeti.
Politsiia qyzmetkerleri kúdiktiniń buǵan deiin urlyq úshin úsh ret isti bolǵanyn aitty. Fakti boiynsha qajetti saraptamalar taǵaiyndaldy.
Ańshylyq myltyq tárkilenip, zattai dálel retinde qylmystyq is materialdaryna qosyldy.
