Taldyqorǵanda jańadan salynǵan kottedjdi qalashyqtyń turǵyndary gazǵa belshesinen qaryzǵa batyp jatyr. 250 tutynýshynyń bereshegi 22 millionǵa jetken, dep habarlaidy "Ult aqparat".
Qazir eki jyl boiy úndemedik degen «QazTransGazAimaq» AQ filialy halyqty jappai sotqa berip jatyr.
Al turǵyndar bolsa úi sýyq bolǵandyqtan kógildir otyn jaqtyq dep shyryldaýda.
«Mine, qalashyqtyń barlyq turǵyndaryn sotqa shaqyryp jatyr. 100, 200 myń teńgedei báriniń qaryzy bar. Qaidan alamyz, meniń asyraýshym joq. Úidiń tóbesi juqa. Barlyq jylý dalaǵa ketedi. Úi sýyq bolǵandyqtan tońbas úshin gazdy aiamai qosa beremiz. «QazTransGazdan» sotqa qaǵaz keldi. Meniki 118 myń teńge dep tur. Men ony qalai tóleimin?», - deidi Taldyqorǵandaǵy kottedjdi qalashyqtyń turǵyny Gúlnár Baibatchaeva.
Aita keteiik, Taldyqorǵanda jańadan salynǵan kottedji qalashyqqa kóship kelgen turǵyndardyń basynan daý arylmai-aq qoidy.
Jańa baspanaǵa kirgennen úidiń sapasyzdyǵyna shaǵymdanyp, endi mine, kógildir otynǵa qaryzǵa battyq dep narazy.
Al turǵyndardy jappai sotqa bergen «QazTransGazdaǵylar» qalashyqqa kógildir otyn qubyry zańsyz tartylǵan dep sheneýnikterdiń kemshiligin jaiyp saldy.
«Myna jerge gaz zańsyz kelip jatyr. Myna Qubyrlar zańdastyrylǵan joq. Myna gaz qosylǵanda bizden bir de bir ruqsat qaǵaz alǵan joq. Zańsyz qosylǵan, biz eki jyl boiy úndemedik» deidi «QazTransGazAimaq» AQ Jetisý óndiristik filialynyń direktory Ravil Ismailov.
Halyq erteń apatty jaǵdai bolsa, eshkim jaýap bermeidi dep qorqady. Al Taldyqorǵanǵa jańadan kelgen ákim «bárin zańdastyramyz» dep halyqty sendirdi.
«Myna gazdyń jobasyn jasadyq. Saraptamadan ótkizemiz de, erteń aqshasyn tólep, barlyǵyn zańdastyramyz. Gaz, trassa komissiia sheshimimen «eksplýatatsiiaǵa» ótýi kerek», - deidi Taldyqorǵan qalasynyń ákimi Erjan Jasybaev.
Sondai-aq, sheneýnikterdiń sózinshe, turǵyndardyń kógildir otynǵa beresheginiń bir bóligin merdiger kompaniia tóleidi.
