Qala kúninde qazaqtyń aqiyq aqyny Muqaǵali Maqataevtyń biýsti Taldyqorǵan qalasyndaǵy «Jastar» saiabaǵynda ornatyldy. Bul aitýly oqiǵamen qala turǵyndaryn oblys ákimi A. Batalov quttyqtady. Saltanatty sharada aqynnyń uly Juldyz Muqaǵaliuly sóz sóiledi, dep habarlaidy "Ult aqparat" Almaty oblysy ákimdiginiń resmi saityna silteme jasap.
Quttyqtaý sózinde oblys ákimi A. Batalov Muqaǵali aqynnyń esimi elimizge ǵana emes, shet memleketterge de tanymal ekenin atap ótti. Ózi týǵan oblystyń ortalyǵynda aqyn biýstiniń ornatylýyn úlken rýhani mańyzy zor oqiǵa dep atady.
- Muqaǵali Maqataev artyna óshpes mura qaldyrdy. Onyń aqyndyǵymen qatar adami qasietterin, tereń bilimdiligin, Otanyna degen kirshiksiz súiispenshiligin qadir tutamyz. Táýelsizdiktiń 25 jyldyǵy men aqyn biýsti ornatylýynyń tuspa-tus kelýinde de úlken mańyzy bar. Bul eskertkish aldyna kelip jastar óleń oqityn, qalalyqtar rýhani demalatyn kórnekti orynǵa ainalatynyna senimdimin, - dedi A. Batalov.
Shara sońynda jinalǵandar eskertkishke gúl shoqtaryn qoiyp, aqyndar óleń oqydy.
Biýstiń avtorlary Shoqan Tólesh pen Altai Beisenov. Biýst tutas granitten jasalǵan, biiktigi 3,5 metrdi quraidy.
