قالا كٷنٸندە قازاقتىڭ اقيىق اقىنى مۇقاعالي ماقاتاەۆتىڭ بيۋستٸ تالدىقورعان قالاسىنداعى «جاستار» ساياباعىندا ورناتىلدى. بۇل ايتۋلى وقيعامەن قالا تۇرعىندارىن وبلىس ەكٸمٸ ا. باتالوۆ قۇتتىقتادى. سالتاناتتى شارادا اقىننىڭ ۇلى جۇلدىز مۇقاعاليۇلى سٶز سٶيلەدٸ, دەپ حابارلايدى "ۇلت اقپارات" الماتى وبلىسى ەكٸمدٸگٸنٸڭ رەسمي سايتىنا سٸلتەمە جاساپ.
قۇتتىقتاۋ سٶزٸندە وبلىس ەكٸمٸ ا. باتالوۆ مۇقاعالي اقىننىڭ ەسٸمٸ ەلٸمٸزگە عانا ەمەس, شەت مەملەكەتتەرگە دە تانىمال ەكەنٸن اتاپ ٶتتٸ. ٶزٸ تۋعان وبلىستىڭ ورتالىعىندا اقىن بيۋستٸنٸڭ ورناتىلۋىن ٷلكەن رۋحاني ماڭىزى زور وقيعا دەپ اتادى.
- مۇقاعالي ماقاتاەۆ ارتىنا ٶشپەس مۇرا قالدىردى. ونىڭ اقىندىعىمەن قاتار ادامي قاسيەتتەرٸن, تەرەڭ بٸلٸمدٸلٸگٸن, وتانىنا دەگەن كٸرشٸكسٸز سٷيٸسپەنشٸلٸگٸن قادٸر تۇتامىز. تەۋەلسٸزدٸكتٸڭ 25 جىلدىعى مەن اقىن بيۋستٸ ورناتىلۋىنىڭ تۇسپا-تۇس كەلۋٸندە دە ٷلكەن ماڭىزى بار. بۇل ەسكەرتكٸش الدىنا كەلٸپ جاستار ٶلەڭ وقيتىن, قالالىقتار رۋحاني دەمالاتىن كٶرنەكتٸ ورىنعا اينالاتىنىنا سەنٸمدٸمٸن, - دەدٸ ا. باتالوۆ.
شارا سوڭىندا جينالعاندار ەسكەرتكٸشكە گٷل شوقتارىن قويىپ, اقىندار ٶلەڭ وقىدى.
بيۋستٸڭ اۆتورلارى شوقان تٶلەش پەن التاي بەيسەنوۆ. بيۋست تۇتاس گرانيتتەن جاسالعان, بيٸكتٸگٸ 3,5 مەتردٸ قۇرايدى.
