Taldyqorǵan politseileri qaladaǵy dámhanalardyń biriniń janynda jergilikti turǵyndy travmatikalyq qarýmen jaraqattaǵan 42 jastaǵy er adamdy ustady, dep habarlady óńirlik politsiia departamentiniń baspasóz qyzmeti.
31 qazanǵa qaraǵan túni qalalyq politsiiaǵa 3-shaǵyn aýdandaǵy dámhananyń janynda atys bolǵany týraly qońyraý tústi. Oqiǵa ornyna jetken politsiia qyzmetkerleri 45 jastaǵy er adamnyń oq jaraqatyn alǵanyn anyqtady. Zardap shegýshi Taldyqorǵan qalalyq aýrýhanasyna jetkizildi.
Kóp uzamai politseiler kórshi úilerdiń birinde turatyn kúdiktini anyqtap, ony politsiiaǵa jetkizdi. Ustalǵan kezde ol mas bolǵan.
Oiyn-saýyq mekemesinde jábirlenýshi men kúdikti arasynda janjal týyndaǵany belgili boldy. Sońynda olardyń biri kóshede qarsylasyna birneshe ret tapanshadan oq atqan.
Kúdiktiden tabylǵan qarý gaz-jaraqat salatyn tapansha bolyp shyqty. Óziniń aitýynsha, tapanshany buǵan deiin qoqys konteinerinen taýyp alyp, úiinde saqtaǵan kórinedi.
"Atalǵan fakti boiynsha sotqa deiingi tergeý Qylmystyq kodekstiń 293-babynyń 3-bóligine (Qarý qoldaný arqyly buzaqylyq jasaý) sáikes júrgizilip jatyr", - dedi Almaty oblysy politsiia departamentiniń baspasóz qyzmeti.
Bul bap boiynsha úsh jyldan jeti jylǵa deiingi merzimge bas bostandyǵynan shekteý nemese aiyrý jazasy qarastyrylǵan.
Qajetti saraptama taǵaiyndaldy. Qazir ustalǵan adam qamaýda otyr.
Oqi otyryńyz
