Foto: freepik.com
Taldyqorǵanda politseiler turǵynnyń 13 million teńgesin qaitardy, – dep habarlaidy Polisia.kz.
Taldyqorǵan qalasynyń jergilikti turǵyny áleýmettik jelilerdi qarap otyryp, Qazaqstanǵa tanymal kompaniialardyń biriniń baǵaly qaǵazdaryna investitsiia salý týraly tartymdy jarnamaǵa kezikken. Jarnama senimdi kórinip, kúmán týdyrmaǵan.
Silteme arqyly ótip, saitqa tirkelgennen keiin er adammen ózin kompaniianyń "menedjerleri" retinde tanystyrǵan adamdar bailanysqa shyqqan. Psihologiialyq tásilderdi paidalanyp, joǵary tabys ýáde etken alaiaqtar jábirlenýshini iri kólemde – 13 million teńge investitsiialaýǵa kóndirgen.
Alaida paida túspegen. Biraz ýaqyt ótken soń ǵana er adam muqiiat oilastyrylǵan alaiaqtyq syzbanyń qurbany bolǵanyn túsingen. Ýaqyt sozbai, jábirlenýshi Taldyqorǵan qalasynyń politsiia basqarmasyna júgingen. Tergeýge kiberqylmystardy tergeý jónindegi tergeý bóliminiń qyzmetkerleri dereý kirisken.
Jas tergeýshi Azamat Janatulynyń basshylyǵymen qysqa merzim ishinde urlanǵan qarajatty alýǵa qatysy bar dropperler anyqtalǵan. Politsiianyń úilesimdi ári jedel jumysynyń nátijesinde urlanǵan barlyq aqshalai qarajat zańdy iesine tolyq kólemde qaitaryldy.
Politsiia azamattardy qyraǵy bolýǵa, kúmándi investitsiialyq usynystarǵa senbeýdi jáne aldaýdyń alǵashqy belgileri baiqalǵan sátte dereý quqyq qorǵaý organdaryna júginý keregin eskertedi.
