Qazirgi kezde Taldyqorǵan qalasy halqynyń sany artyp, 180 myń adamǵa jetip otyr. Bul týraly Almaty oblysynyń ákimi A. Batalovtyń turǵyndar aldyndaǵy esep berý jiynynda aityldy, dep habarlaidy aimaq basshysynyń baspasóz qyzmeti.
Óz sózinde ákim Taldyqorǵan qalasynyń damýyna erekshe toqtalyp ótti. Jiynda aitylǵandai, 8-shaǵyn aýdanda 782 páterge arnalǵan 24 kópqabatty úilerdiń qurylysy bastalady, onyń ishinde jeteýi osy jyly paidalanýǵa beriledi. Osyǵan bailanysty 1200 oryndyq mektep qurylysyn dereý bastaý josparlanǵan. Oǵan qosa investorlar esebinen Shyǵys shaǵyn aýdanynda 726 páterlik 22 úidiń qurylysy bastalady.
- Ótken jyly kottedj qalashyǵynda 155 úi salynyp, olar eń aldymen kóp balaly otbasylarǵa berildi. Biyl 403 kottedj paidalanýǵa beriledi. Munda kóp kóp balaly otbasylar turady, balalar kóp, sondyqtan 900 oryndyq mektep pen 280 oryndyq balabaqsha salamyz. Sondai-aq, men eki balalar alańyn, fýtbol alańyn ornatýdy, búkil aýmaqty tolyq abattandyrýdy tapsyrdym. Kottedj qalashyǵynyń turǵyndary keleshekte ádemi saiabaq aimaǵynda ómir súretin bolady, - dedi A. Batalov.
Oblys ákiminiń aitýynsha, biylǵy jyly paidalanýǵa beriletin Jetisý memlekettik ýniversiteti jataqhanasynyń ǵimaraty men jabyq júzý basseini qalany odan ári kórkeitpek.
- Qalamyzdyń sáýletine úilesip turatyn bul ádemi ǵimarattardyń ainalasy tiisti deńgeide kóriktendirilýi tiis. Ókinishke qarai, qala basshylyǵy men sáýlet basqarmasy bul máselelermen durys ainalyspai otyr. Sondyqtan barlyq jaýapty tulǵalarǵa jáne oblystyń jańa sáýletshisine osy máseleni baqylaýǵa alyp, sheshýdi tapsyramyn. Jeke tasymaldaýshylardy sýbsidiialaý tetigin paidalana otyryp, qalalyq kólikti jańartý kerek. Olardyń jaily avtobýstar satyp alyp, sapasy men qaýipsizdigin qamtamasyz etýi úshin talaptardy kúsheitý kerek. Qalalyq marshrýttarda elektrondyq biletti engizetin ýaqyt jetti, oǵan qarjy qarastyrylǵan, - dedi A. Batalov.
