Maýsym aiynan bastap barlyq JOO-lar qujattardy elektrondy túrde qabyldai bastaidy. Bul týraly QR Bilim jáne ǵylym ministri Ashat Aimaǵambetov onlain konferentsiiada aitty, dep habarlaidy QazAqparat.
«Tsifrlandyrý máselesi óte ózekti bolyp tur. Biz biyl birinshi ret tsifrlyq rejimde UBT tapsyrýǵa qujattardy qabyldadyq. Aldyńǵy jylmen salystyrǵanda qujattardyń sany biraz kóbeidi. Tsifrlandyrý máselesi ary qarai da bizdiń basty nazarymyzda bolady», - deidi QR Bilim jáne ǵylym ministri Ashat Aimaǵambetov.
Onyń aitýynsha, endi JOO men kolledjderge qujat qabyldaý naýqany bastalady. Bul máseleni de qazirgi jaǵdaiǵa sáikes durys jolǵa qoiyp, tiimdi iske asyrý kerek.
«Jyl saiyn 300 myńnan astam túlek kolledj ben JOO-ǵa qujattar tapsyrady. Qujattar paketi fotosýret, kóshirme, kýálikten jáne basqa da 6 qujattan turady. Bul qujattardy jinaý úshin shamamen 4 myń teńge ketedi. Jyl saiyn osyndai qujattardy tapsyrýǵa 1 mrld teńge jumsalady. Sonymen qatar qujattardy baryp tapsyrý, kezekke turý kerek. Mundai qajetsiz kezekke turýdy boldyrmaý úshin qujattardy qabyldaýdy avtomattandyrý kerek. Biyl barlyq bilim berý uiymdaryna qabyldaý Elektrondyq úkimet portaly arqyly júzege asyrylady. Portalda kishkene apattyq jaǵdai oryn alǵandyqtan, onyń qalai júzege asyrylatynyn qazir kórsete almaimyz. Maýsym aiynan bastap barlyq JOO-lar qujattardy elektrondy túrde qabyldaidy», - deidi Bilim jáne ǵylym vitse-ministri Rústem Biǵary.
