Qazaqstannyń depozitterge kepildik berý qory litsenziiadan aiyrylǵan banktegi talap etilmegen depozitterdi Biyrńǵai jinaqtaýshy zeinetaqy qoryna aýdarady. Osyndai norma 2021 jyldyń 1 mamyrynan bastap qoldanysqa engiziledi, dep habarlaidy "Ult aqparat" BJZQ baspasóz qyzmetine silteme jasap.
2021 jyldyń 1 mamyrynan bastap Qazaqstannyń depozitterge kepildik berý qorynyń (QDKBQ) talap etilmegen kepildi ótem somalaryn erikti zeinetaqy jarnalary (EZJ) esepke alynatyn jeke zeinetaqy shottaryna (JZSh) esepke alý úshin BJZQ-ǵa aýdarý tártibin belgileitin «Qazaqstan Respýblikasynyń keibir zańnamalyq aktilerine ekonomikalyq ósýdi qalpyna keltirý máseleleri boiynsha ózgerister men tolyqtyrýlar engizý týraly» Qazaqstan Respýblikasy Zańynyń normalary qoldanysqa engiziledi.
«Bul degenimiz, eger depozitterge mindetti kepildik berý júiesiniń qatysýshysy bolǵan jáne barlyq bank operatsiialaryn júrgizýge arnalǵan litsenziiadan aiyrylǵan depozit salymshysy kepildik berilgen ótemdi tóleý bastalǵan kúnnen bastap bir jyl ishinde Qazaqstannyń depozitterge kepildik berý qoryna júginbese, onda kepildi ótemniń talap etilmegen somasyn erikti zeinetaqy jarnalary (EZJ) esepke alynatyn jeke zeinetaqy shottaryna (JZSh) esepke jatqyzý úshin BJZQ-ǵa aýdarady», delingen habarlamada.
Budan basqa, 1 mamyrynan bastap EZJ esepke alynatyn JZSh-ny avtomatty túrde (ótinish bermei) ashý úshin BJZQ-ǵa alǵash ret túsken:
- salymshy-jeke tulǵadan óz tabysy esebinen óz paidasyna nemese salymshydan (jeke/zańdy tulǵadan) alýshynyń paidasyna erikti zeinetaqy jarnasy;
- QDKBQ-dan kepildi ótemniń talap etilmegen somasy negiz bolyp tabylady.
«Bul rette paidasyna tólemder júrgiziletin jeke tulǵany sáikestendirý tólem tapsyrysynyń elektrondyq formatynda kórsetilgen derbes derekter (TAÁ, JSN, týǵan kúni) boiynsha júzege asyrylatyn bolady, al barlyq qajetti málimetter: jeke tulǵanyń jeke basyn kýálandyratyn qoldanystaǵy qujattyń derektemeleri týraly, turaqty turatyn jeri týraly, ózge de málimetterdi BJZQ memlekettik organdardyń tiisti aqparattyq júielerinen alatyn bolady», delingen habarlamada.
Eger azamattyń BJZQ-da EZJ esepke alynatyn JZSh-sy burynnan ashylǵan bolsa, onda kepildik berilgen ótemniń talap etilmegen somasy osy shotqa esepteledi.
«JZSh-ǵa eseptelgen kepildik berilgen ótemniń talap etilmegen somalary EZJ-nyń basqa somalary siiaqty tártipte investitsiialanatynyn atap ótken jón.
BJZQ-da EZJ esebinen zeinetaqy jinaqtary bar adamdar olardy 50 jasqa tolǵan kezde, múgedektik týyndaǵan kezde, Qazaqstan Respýblikasynyń sheginen tys jerlerge Qazaqstan Respýblikasynyń zańnamasynda aiqyndalǵan, ketý nietin nemese deregin rastaityn qujattardy usynǵan sheteldikter jáne azamattyǵy joq adamdar retinde turaqty turýǵa ketken kezde alýǵa quqyly.
Joǵaryda kórsetilgen jaǵdailar bastalǵanǵa deiin talap etilmegen somany qaitarý úshin salymshy «Qazaqstan Respýblikasynyń ekinshi deńgeidegi bankterinde ornalastyrylǵan depozitterge mindetti kepildik berý týraly» Zańǵa sáikes QDKBQ-ǵa ótinish jasai alady. QDKBQ óz kezeginde BJZQ-ǵa habarlama jiberedi jáne qaitarý júrgiziledi. Bul rette, eger BJZQ salymshysynyń EZJ boiynsha shoty avtomatty túrde ashylyp, QDKBQ-ǵa qaitarylǵannan keiin qarajat qalmasa, onda ol bir aidan keiin avtomatty túrde jabylady», delingen habarlamada.
