Biz ózge memleketterdiń elimizde film túsirýin qoldaimyz jáne kómektesýge daiynbyz.
Bul týraly «Ulttyq kinony qoldaý ortalyǵy» kommertsiialyq emes aktsionerlik qoǵamynyń qyzmeti týraly baspasóz máslihatynda aityldy, dep habarlaidy QazAqparat.
«Ulttyq kinony qoldaý memlekettik ortalyǵy» Nur-Sultan qalasynda byltyr mamyr aiynan jumys istei bastasa, qyrkúiek aiynda Almatyda filialy ashyldy. Kinematografiia týraly zań jobasy qabyldanǵany - elimizdegi kino salasyn damytýdaǵy úlken qadam boldy», - deidi «Ulttyq kinony qoldaý memlekettik ortalyǵynyń» basqarma tóraǵasy Gúlnar Sársenova.
Ol atalǵan ortalyq bes baǵyttaǵy máseleni sheshýmen ainalysatynyn aitty.
«Birinshi másele, filmderdi qarjylandyrý. Munyń ishine kórkem filmder ǵana emes, derekti film, animatsiialyq film, ózge memleket túsiretin filmder de kiredi. Ekinshi másele, investitsiia tartyp, ulttyq kino komissiiasyn qurý. Biz ózge memleketterdiń elimizde film túsirýin qoldaimyz jáne kómektesýge daiynbyz. Mysaly, «Taqtar oiyny« telehikaiasy Islandiia, Jańa Zelandiia, Marokko siiaqty tanymal emes memleketterde túsirilgen. Kinojoba túsirilip, kórsetile bastaǵan soń bul memleketterde týrizm salasy 300-800 esege ósken. Demek bul eldiń ekonomikasyna úles qosý ǵana emes, kino jáne týrizm salasyn damytýǵa da úles qosý dese bolady», - deidi ol.
