Áýejaida eGov Mobile qosymshasy arqyly tsifrlyq jeke kýálik usyný múmkindigi bar qalalardyń sany taǵy úsh shaharmen tolyqty, dep habarlaidy QazAqparat.
Budan bylai Óskemen, Semei jáne Qostanai qalalarynyń áýejailarynda da jeke derekterdi rastaý úshin eGov Mobile qosymshasy arqyly tsifrlyq jeke kýálikti usynýǵa bolady. Buryn mundai qyzmet Nur-Sultan, Almaty, Aqtóbe, Shymkent, Túrkistan, Aqtaý, Atyraý, Taraz, Petropavl, Qaraǵandy qalalarynyń áýejailarynda qoljetimdi edi.
«Áýejaida tsifrlyq jeke kýálikti paidalaný úshin eGov mobile qosymshasynda tirkelgen paidalanýshy «Tsifrlyq qujattar» servisine kirip, tizimnen jeke kýálikti tańdai alady. Áýejaidyń tirkeý taǵanynda, sondai-aq ushý aldyndaǵy tekserýden ótý kezinde serviste jasalǵan QR-kody bar smartfonnyń ekranyn kórsetý qajet», - dep jazylǵan QR Azamattyq aviatsiia komitetiniń baspasóz qyzmeti taratqan aqparatta.
Ishki reisterde tsifrlyq jeke kýálikti paidalaný múmkindigi QR Indýstriia jáne infraqurylymdyq damý ministrligi men QR Tsifrlyq damý, innovatsiialar jáne aeroǵarysh ónerkásibi ministrliginiń, Azamattyq aviatsiia komiteti men «Qazaqstannyń aviatsiialyq ákimshiligi» AQ-nyń, áýe kompaniialary men áýejailardyń jáne «Ulttyq aqparattyq tehnologiialar» AQ-nyń júielerin integratsiialaýdyń arqasynda múmkin boldy.
Tsifrlyq qujattar servisi pilottyq rejimde qoldanylyp jatqanyn atai ketý kerek.
