Qazaqstanda koronavirýs saldarynan qaitys bolǵandar sany taǵy 10 adamǵa kóbeidi. Bul týraly 27 aqpan kúni eldiń densaýlyq saqtaý ministrligi habarlady.
Resmi derekke sáikes, qaitys bolǵandardyń barlyǵy Covid-19 virýsyn juqtyrǵany (KVI+) anyqtalǵan. Aqparatta bir kúnde koronavirýspen 860 naýqas tirkelgeni, onyń 54-ine PTR testimen rastalmaǵan (KVI-) koronavirýs pnevmoniiasy diagnozy qoiylǵany aitylǵan.
Qazaqstan koronavirýs naýqastarynyń statistikasyn eki bólek júrgizip keledi. Qazirgi málimet boiynsha, elde 20 280 naýqas emdelip jatyr (13523 –KVI+, 6757 – KVI-). Statsionarda jatqan 4380 naýqastyń 253-iniń jaǵdaiy aýyr, al 49 adam asa aýyr halde, 42 naýqas ókpeni jeldetý apparatynyń kómegimen tynystap jatyr dep habarlaidy ministrlik. Buǵan qosa 15900 naýqas ambýlatoriia emin alyp júr.
Qazaqstanda Covid-19 indeti kelgeli virýs juqtyrǵany PTR testimen rastalǵan 2743 adam qaitys bolǵan.
Qazirgi resmi málimet boiynsha, Qazaqstanda indet bastalǵaly beri barlyǵy 212 018 adamnyń Covid-19 virýsyn (KVI+) juqtyrǵany rastalǵan. Al resmi statistikasy byltyr tamyzdan beri júrgizilip kele jatqan KVI- juqtyrǵandar sany 49 226 adamǵa jetti, onyń 620-sy qaitys bolǵan.
