Tabiǵatty qorǵaý inspektorlary quqyq búzýshylardy ustap, qylmysty tirkei alady. Bul týraly QR Ekologiia, geologiia jáne tabiǵi resýrstar vitse-ministri Erlan Nysanbaev málimdedi, dep habarlaidy QazAqparat.
Jańa ózgerister «QR keibir zańnamalyq aktilerine agroónerkásiptik keshendi retteý máseleleri boiynsha ózgerister men tolyqtyrýlar engizý týraly» QR zańynda kórsetilgen.
«Bizdiń memlekettik inspektorlarǵa shabýyl jasalǵany týraly sońǵy oqiǵalardan keiin inspektorlardyń ómiri men densaýlyǵyn qorǵaý úshin shara qabyldaýǵa týra keldi. Ol úshin inspektorlardyń nemese jaqyndarynyń ómirine qastandyq nemese zorlyq-zombylyq úshin jaýapkershilikti kúsheitý jumystary júrgizilip jatyr», - dedi vitse-ministr Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, memlekettik inspektorlardyń qyzmettik avtokólikterine arnaiy daýys zoraitqysh quraly men arnaiy dabyldar ornatylady.
«2012 jyldyń 24 mamyryndaǵy Úkimettiń № 670 Qaýlysymen retteletin qyzmettik qarý men arnaiy quraldardy qoldaný tártibin de qaita qarap jatyrmyz. Onda inspektor ózine oq atylǵan jaǵdaida ǵana qarý qoldanýǵa quqyly. Zań arqyly Orman kodeksine, «Airyqsha qorǵalatyn tabiǵi aýmaqtar týraly» jáne «Janýarlar álemin qorǵaý, paidalaný týraly» zańdarǵa vedomstvoǵa ýákiletti organ men onyń aýmaqtyq bólimshelerin qadaǵalaý fýnktsiiasy jóninde ókilettik berý týraly túzetýler engizildi», - dedi Erlan Nysanbaev.
Qadaǵalaý fýnktsiiasynyń bolýy inspektorlarǵa jeke jáne zańdy tulǵalardyń zańǵa qaishy áreketine jedel jaýap qatýǵa (toqtatý, qujat tekserý, ustaý, aýlaý quraldaryn, qarý-jaraqty tárkileý) jedel shara qabyldaýǵa múmkindik beredi. Odan bólek, aýlanǵan ań-qus pen balyq ta tárkilenedi. Bul sharalar jeke tulǵalarǵa da, zańdy tulǵalarǵa da qatysty.
