«Devýshka iz Danii»-di kórgennen keiin, Di Kaprio biyl taǵy da «Oskardan» qur qala ma dep oilap qaldym. Eddi Redmeinniń tamasha oiynyn kórip, bas shaiqamaýǵa amal qalmady. Gerda Vegenerdiń kúieýi, sýretshi Einar obrazyn hám jynysyn aýystyryp, «Lili» esimin alǵan «azat áieldiń» beinesin nanymdy alyp shyqqan. Tabiǵattyń tylsym syryna qumartqan sýretshi jigittiń áp sátte ádemi qyzǵa ainalyp shyǵa kelýi – naǵyz talanttyń eki bólek obrazdy sheber qiiýlastyrýy dep túsinsek bolady.
Árine, filmniń negizgi taqyryby – óte daýly. Bul kartina tarihi derek boiynsha, álemde alǵash ret jynysyn ózgertýge áreket jasaǵan adam — sýretshi-peizajist Einar Vegenerdiń ómiri týrasynda syr shertedi. «Transseksýalizm» — búgingi qoǵam derti. Kinony kórgennen keiin kópshilik jurt Tom Hýperdi jarysa jamandap, azǵyndyqty nasihat etip otyr dep aiyptaýy múmkin. Sebebi, ózin qyz sekildi sezinetin, «jat tánnen» qutylýǵa asyq qanshama jas filmnen keiin azat oidyń shyrmaýyna túsip, azapty iske aiaq basýy yqtimal. Rejisser jan qalaýyn qanaǵattandyratyn keiipkeri arqyly oi erkindigin keńistikke shyǵaryp, is júzinde júzege asýyna tilek qosqandai. Bunyń ar jaǵynan «adam óz tańdaýymen ómir súrý kerek» degen mazmundaǵy ideia bas kótergendei bolady.
Sonda biz ańsaǵan «erkindiktiń» máni ne? Táńir syzyp bergen sheńberden shyǵýǵa áreket etý — bizge qanashylyqty kúná artady? Bul jolda japa shekken «sharasyzdardy» qalai aqtap alamyz? Tabiǵat zańyn ózgertý – Táńirmen talasqa túsý. Ne desek te, jaratylysqa qarsy shyqqanyna qaramai, «Qudaidyń qalaýymen áielge ainaldym» dep kúpir sóileitin keiipkerdi keshire almai-aq qoidym… Redmein meni ózin aiaýǵa májbúrledi. Túsinýge shaqyrdy. Ózi sekildi qanshama adamnyń ishki arpalysyn kórsetýge talpyndy. Bul – óte qaýipti. «Aqyndarǵa azǵyndar eretinindei», ártister de adamdardy adastyrady… Árine, parqyna jete bilgenderden ózge. Buǵan tek óner dep qaraý kerek. Áńgimeniń bári akterdiń áserli oiynynan týyp otyr.
Aitpaqshy, «Oskardyń» 4 nominatsiiasyna usynylǵan filmdi Katar eliniń joǵarǵy biligi 4 kúnnen keiin óz kinoteatrlarynan alyp tastady. Katarlyq internet qoldanýshylar «film halyqty adamdyqtan attaityn áreketterge itermeleidi» dep shaǵym túsirgen eken.
Sherhan Talap
.jpg)
