Tabiǵat qorǵaýshylar elordany eleń etkizgen, múiizinen jaraqat alǵan eliktiń jarasyn jazyp, erkindikke jibermek, dep habarlaidy "Ult aqparat".
«Búgin kúndiz áleýmettik jeliler arqyly elordada shaýyp júrgen eliktiń videosy tarap ketti. Videomaterialdy kórgennen keiin biz elikti izdestirý jumystaryna birden kirisip kettik. Ózimmen birge Aqmola oblystyq aýmaqtyq orman sharýashylyǵy jáne janýarlar álemi ispektsiiasynyń mamandary Uly Dala, Máńgilik el, Turan kóshelerin aralap, Mega OSO, Ekspo, Nazarbaev ýniversiteti jaǵyn kórip qaittyq. Arada bir jarym saǵat ótkende elik jańadan salynyp jatqan turǵyn úidiń mańynan tabyldy», - dep jazady QR Aýyl sharýashylyǵy ministrliginiń Orman sharýashylyǵy jáne janýarlar dúniesi komitetiniń baspasóz hatshysy Sáken Dildahmet Facebook paraqshasynda.
Túz taǵysy múiizinen jaraqat alǵan kórinedi. Elikti ustap alǵannan keiin tabiǵat qorǵaýshylar ony veterinarlyq qyzmet ortalyǵyna aparǵan.
«Veterinarlar eliktiń jarasyn emdep, ýaqytsha ózderinde qaldyrdy. Mamandar belgili bir merzim ishinde elikti baqylaidy. Jaǵdaiy jaqsarsa qaitadan dalaǵa qoia beredi», - dep jazady ol.
Sáken Dildahmet elordanyń mańynda jabaiy ańnyń mol ekenin aitady. Túz taǵysy aqtútek borannan adasyp nemese azyq izdep qalaǵa kirip ketken bolýy kerek.
«Ótken jyly da osyndai jaǵdai tirkelgen. Osy jaǵdaiǵa bei-jai qaramaǵan azamattarǵa alǵysymyzdy aitamyz. Eger qandaida da bir jabaiy ańdy kórip qalsańyz 8(7172) 749170 nemese 87755050155 nómirine habarlasýyńyzǵa bolady», - deidi ol.
Buǵan deiin QazAqparat EKSPO mańynda elik shaýyp júrgenin habarlaǵan bolatyn. Kóp ótpei ony mamandar ustap alǵan edi .
