Qazaqstannyń syrtqy ister ministrligi Aýǵanstandaǵy jaǵdaiǵa qatysty resmi málimdeme taratty, dep habarlaidy "Ult aqparat".
"Qazaqstan Aýǵanstandaǵy jaǵdaidyń damý barysyn muqiiat qadaǵalap otyr. Atalǵan eldiń tarihynda taǵy bir sheshýshi sát kele jatyr. Kópjyldyq janjaldy aýǵan halqy ózi sheshýi kerek", - delingen resmi habarlamada.
Qazaqstan barlyq tarapty ishki turaqtylyqtyń basty alǵysharty retinde biliktiń beibit tranzitin qamtamasyz etýge shaqyrdy.
"Biz BUU Qaýipsizdik Keńesiniń inkliýzivti jáne ókildik úkimet qurý, az ulttar men áielderdiń quqyqtaryn qurmetteý, basqa memleketterge qaýip tóndiretin toptardyń bolýyna jol bermeý, halyqaralyq quqyqty saqtaý týraly málimdemesin qoldaimyz. Osy erejelerdi oryndaý Aýǵanstannyń jańa biligimen dialogty bastaý úshin qajetti shart bolýǵa tiis", - delingen málimdemede.
Qazaqstanǵa júzdegen adam jetkizildi
Kúni keshe qorǵanys ministrligi aýǵan jerinen arnaiy bortpen 42 adamnyń jetkizilgenin málimdedi. Olardyń ishinde 25 Qazaqstan azamaty (15 eresek adam jáne 10 bala) bar. Elshiliktiń qyzmetkerleri de keldi.
Sondai-aq áskeri ushaqpen Qyrǵyzstannyń ótinishi boiynsha Qyrǵyz Respýblikasynyń 14 azamaty evakýatsiialandy. Qazaqstan elshiligine kómek surap kelgen 1 Resei azamaty men 1 Litva azamaty Aýǵanstannan shyǵaryldy.
Al BUU Bas hatshysynyń resmi ókili Stefan Diýjarrik qaýipsizdik maqsatynda Birikken ulttar uiymynyń júzge jýyq qyzmetkeri qashyqtan jumys isteý úshin Kabýldan Almatyǵa aýystyrylǵanyn málimdedi. Onyń aitýynsha, olar Aýǵanstanǵa jaǵdai turaqtalǵan kezde oralady.
Aýǵanstanda ne bolyp jatyr?
16 tamyzǵa qaraǵan túni Taliban* saiasi keńsesiniń ókili Muhammed Naim Aýǵanstandaǵy soǵys aiaqtalǵanyn jáne memlekettegi basqarý formasy jaqyn arada naqtylanatynyn habarlady. Qazir Aýǵanstannyń shekarasyn Taliban* sodyrlary baqylaýǵa aldy. Sheteldik qyzmetkerler Kabýldaǵy jalǵyz áýejai arqyly evakýatsiialanyp jatyr.
Taliban* - Aýǵanstandaǵy bilikti basyp alǵan dini ekstremistik uiym. Qazaqstanda, Reseide jáne basqa da birqatar elde tyiym salynǵan.
