Syrdariia ózeniniń saǵasyn qalpyna keltirý jumysy 2023 jyly bastalady. Bul jaiynda Senat depýtattarynyń saýalyna QR Premer-Ministri Álihan Smaiylovtyń jaýabynda aitylǵan, dep habarlaidy QazAqparat.
«Búgingi kúni Syrdariia ózeniniń arnasyn retteý jáne Aral teńiziniń soltústik bóligin saqtaý jónindegi jobanyń birinshi kezeńi (SARATS-1) aiasynda salynǵan Kókaral bógeti qaita jańartýdy talap etedi. Sý kólemi 27 mlrd tekshe metr bolatyn shaǵyn Aral teńiziniń bir oblysta ǵana emes, áleýmettik-ekonomikalyq damýǵa aitarlyqtai áser etetinin eskere otyryp, Memleket basshysy 2019 jyly Úkimetke shaǵyn Araldy saqtaý boiynsha is-sharalar qabyldaýdy tapsyrdy», - dep atap ótedi Úkimet basshysy jaýabynda.
Premer-Ministr bul másele Úkimettiń baqylaýynda turǵanyn basa aitady.
«Osyǵan bailanysty, 2020 jyly «Kókaral bógetin saqtaý jáne Syrdariia ózeniniń saǵasyn qalpyna keltirý» jobasynyń jobalaý-smetalyq qujattamasyn ázirleýge respýblikalyq biýdjetten 100,5 mln teńge bólindi. Búgingi tańda jobalyq-smetalyq qujattama ázirlendi. Jobanyń JSQ-syna memlekettik saraptama qorytyndysy osy jyldyń qyrkúiek aiynda shyǵýy kerek. Qurylys-montaj jumystaryn 2023 jyly bastaý josparlanyp otyr», - dedi Álihan Smaiylov.
