2018 jyly maýsymnan bastap Qyzylorda oblysynda Máskeýge áýe reisi jáne Tashkentke avtobýstar qatynaityn bolady. Bul týraly oblys ákimi Qyrymbek Kósherbaev kólik qyzmetkerleri kúnine orai ótken saltanatty jiynda habarlady.
Aimaq basshysy sala qyzmetkerlerin kásibi merekelerimen quttyqtap, oblys jetistikterine toqtalyp ótti.
«Sońǵy jyldary respýblika boiynsha, onyń ishinde Syr óńirinde kólik salasy qarqyndy damýda. 2017 jyldyń tamyz aiynda 200 avtobýsqa arnalǵan halyqaralyq talaptarǵa sai keletin, zamanaýi úlgidegi jańa avtobýs parki iske qosyldy. Halyqaralyq baǵyttaǵy jolaýshy tasymalyn jetildirý maqsatynda, 2018 jyldyń 18 shildesinen bastap kórshiles Ózbekstan elimen halyqaralyq «Qyzylorda-Tashkent-Qyzylorda» avtobýs marshrýty jumysyn bastady. Sonymen qatar, biznes ókilderi men Reseide oqyp jatqan Syr túlekterine tikelei kólik qatynasyn paidalanýǵa múmkindik týǵyzyp otyrǵan halyqaralyq «Máskeý-Qyzylorda-Máskeý» reisi ashyldy. Alashtyń anasy Syr eli men Saryarqa tósin jalǵaityn «Qyzylorda – Jezqazǵan» poiyzy Aral óńiriniń eldi mekenderin kólik qatynasymen qamtamasyz etip otyr. 2017 jyldyń shildesinen bastap «Qyzylorda-Besaryq-Túrkistan» baǵytyndaǵy jańa vagondardan quralǵan ozyq úlgidegi jolaýshylar poiyzy júrgizile bastady. Oblys kólemindegi kólik infraqurylymyn damytý baǵytyndaǵy jumystar budan ári de jalǵasyn tabady», - dedi aimaq basshysy.
Saltanatty jiynda 16 qyzmetker jáne sala ardagerleri oblys ákimi men Qazaqstan Respýblikasy Investitsiialar jáne damý ministrligi tarapynan marapattaldy.
Aita keteiik, oblys aýmaǵynda avtomobil joldarynyń jalpy uzyndyǵy 3450 shaqyrymdy quraidy. Onyń 1107 km respýblikalyq, 472 km oblystyq, 1870 km aýdandyq mańyzy bar joldar. 2018 jyly jergilikti mańyzy bar avtomobil joldary men eldi mekender kóshelerin jóndeýge jáne kólik infraqurylymyn damytýǵa 13,5 mlrd.teńge bólinip, 278 km jol jóndeýden ótkiziledi. Sonymen qosa, aǵymdaǵy jyly Shirkeili arnasyna kópir salý jobasy bastalyp, aýdandyq mańyzy bar joldardyń boiynda ornalasqan 5 kópirge jóndeý jumystary júrgiziledi.
2013-2017 jyldar aralyǵynda jergilikti mańyzy bar avtomobil joldarynyń boiynda ornalasqan 10 kópir jóndeldi, Qyzylorda qalasy men Syrdariia aýdanynda kópir salynyp paidalanýǵa berildi.
