Tólepbergen Ábdirashevtiń esimi Syrdariianyń sol jaǵalaýyndaǵy jańa qalanyń kóshelerdiń birine beriledi.
Jańaqorǵan aýdanynda QR halyq ártisi, QR Memlekettik syilyǵynyń laýreaty, QR eńbek sińirgen qairatkeri, dirijer Tólepbergen Ábdirashevtyń týǵanyna 70 jyl tolýyna arnalǵan respýblikalyq ǵylymi-tájiribelik konferentsiia uiymdastyryldy.
Sharaǵa arnaiy barǵan oblys ákimi Qyrymbek Kósherbaev Syr óńiri óner salasynyń maitalmandarymen tanymal ekenin atap ótti.
«Osyndai Syr eliniń abyroiyn asqaqtatqan talanttarynyń biri – jerlesimiz Tólepbergen Ábdirashev. Qazaqstan Respýblikasynyń Halyq qaharmany Nurǵisa Tilendiev aitqandai, «Tólepbergen qazirdiń ózinde álemdik ónerdiń injý-marjan tulǵasy». Ózderińiz biletindei, Qazaqstan Respýblikasy Úkimetiniń qaýlysymen ózi oqyǵan №239 orta mektepke Tólepbergen Ábdirashevtiń esimi berilip, qoǵamdyq negizdegi mýzeii ashyldy. Bolashaqta mekteptiń aldynda Ábdirashevtiń eskertkishi qoiylady. Odan bólek, Syrdariianyń sol jaǵalaýynda salynyp jatqan jańa qaladaǵy kósheleriniń birine T.Ábdirashevtiń esimi berilmek», - dedi aimaq basshysy.
T.Ábdirashev syndy oblystyń talantty ónerpazdarynyń isin olardyń shákirtteri jalǵastyrýda. Syr óńiriniń óneri óz jerimizde ǵana nasihattalyp qoimai, Resei, Túrkiiaǵa, London, AQSh-tyń Niý-Iork, Vashington qalalaryna, Ázirbaijan, Ózbekstan Respýblikalaryna tanylýda.
Biz Syr óńiriniń altyn qazynasy - jyrshylyq ónerdi jas urpaqqa nasihattaý, túrki halyqtarynyń ulttyq folklorlyq-mýzykalyq ónerin dáripteý jáne ózara mádeni bailanysty nyǵaitý maqsatynda Halyqaralyq «Qorqyt jáne Uly Dala sazy» folklorlyq mýzykalyq óner festivalin ótkizýdi dástúrge ainaldyrdyq.
«Syr eli – jyr eli» desek, qazirgi tańda Syr óńirindegi birneshe jyraýlar mektebiniń ókilderi búgingi kúnge deiin ulttyq ónerdi dáriptep keledi.
Olardy zamanaýi deńgeide dáriptep, nasihattaý úshin aimaqta «Qazaq dástúrli óner akademiiasyn» ashýdy josparlandy.
Sondai-aq, konferentsiiada Tólepbergen Ábdirashevtiń ustazy, Qazaqstan Respýblikasynyń eńbek sińgen qairatkeri Merýert Qalenbaeva sóz sóilep, konferentsiiaǵa qatysýshylardy Ábdirashevtiń ónerine erekshe kóńil bólgeni úshin jáne oblysta ónerpazdardy qoldaý boiynsha júrgizilip jatqan jumys úshin alǵysyn bildirdi.
Aita ketsek, Tólepbergen Ábdirashev 1948 j. 26 shilde kúni Jańaqorǵan aýdanynyń Keńes («Iýbileinyi») kensharyna dúniege keldi. Máskeý konservatoriiasynda bilim aldy, Gennadii Rojdestvenskiidiń shákirti. 25 jylǵa jýyq ýaqyt ishinde Qazaqstan Respýblikasynyń Memlekettik simfoniialyq orkestri men Qurmanǵazy atyndaǵy Ulttyq konservatoriianyń dirijer synybyn basqaryp keldi. Shákirtteri – Alan Bóribaev, Abzal Muhitdinov, Erbolat Ahmediiarov. 2007 j. 26 qazan kúni Almaty qalasynda qaitys boldy.
