Irandyq kúrish sortynyń alǵashqy 500 tonnasy biyl eksporttalady, dep habarlaidy "Ult aqparat" oblys ákimdiginiń baspasóz qyzmetine silteme jasap.
2018 jyly kúrishshiler sý tapshylyǵyna qaramastan, 473 myń tonna ónim jinap, Mońǵoliia, Túrkiia jáne Aýǵanstan naryqtaryn igerip jatyr.
«Ótken jyly óńirde dástúrli ónimnen bólek Iranǵa eksportqa shyǵarý úshin kúrishtiń irandyq sortyn ósirý bastaldy. Qazirgi ýaqytta birinshi partiia - 500 tonna irandyq kúrish sortyn killogramy - 810 teńgeden, iaǵni búgingi eksporttyq baǵadan 4 ese joǵary baǵada jóneltý jóninde kelissózder júrip jatyr», - delingen habarlamada.
Sonymen qatar, eginshilikti damytý sýarmaly jerlermen shektelgenin eskere otyryp, mol ónim beretin jáne sýdy az qajet etetin daqyl alqaptaryn kóbeitýge, sondai-aq, mal sharýashylyǵyn damytý úshin jem jáne azyqtyq dándi daqyldar alqaptaryn ulǵaitýǵa basymdyq beriledi.
2018 jyly kúrish alqaptary 3 myń gektarǵa kemidi, al maily daqyldar, atap aitqanda maqsary - 2013 jyly 1659 gektardan 2018 jyly 8404 gektarǵa deiin ulǵaidy. Bul maqsary maiyn óndirip, 2018 jyly birinshi ret osy ónimniń 50 tonnasyn Qytai naryǵyna shyǵarýǵa múmkindik berdi. Qytaiǵa jyl saiyn 2,4 myń tonnadan kem emes maqsary maiyn jetkizý boiynsha kelisimshart jasaldy. Osynyń esebinen ósimdik sharýashylyǵy ónimderi eksporty 28% ósedi.
Ótken jyldan bastap aimaqta soia jáne azyqtyq daqyldar - sýdan shóbi, qant qumai siiaqty mol daqyldardy engizý jumystary bastaldy. Biyl kúrish alqaptary taǵy 2171 gektarǵa azaiyp, 4068 gektarǵa azyqtyq jáne 1293 gektarǵa kartop, kókónis, baqsha daqyldary egiledi.
