Shymkentte 8 jastaǵy qyzǵa jynystyq sipattaǵy áreket jasaǵan 56 jastaǵy er adam 7 jyl 6 aiǵa bas bostandyǵynan aiyryldy. Buǵan deiin oǵan aiyppul túrindegi jaza taǵaiyndalǵan edi. Alaida is qaita qaralyp, sot jańa úkim shyǵardy, dep habarlaidy ult.kz.
Oqiǵa biyl 28 sáýirde kópqabatty úidiń kireberisinde bolǵan. Sot materialdaryna sáikes, er adam kórshi turatyn 8 jastaǵy qyzǵa shokolad alyp berýge ýáde berip, sońynan ergen. Keiin ekeýi liftige kirgen kezde ol balaǵa aqsha usynyp, ózimen birge alyp ketýge áreket jasaǵan.
Qyz er adamnyń usynysyna kelispei, liftten qashyp shyqqan. Alaida er adam onyń sońynan erip, balany qushaqtap, denesine qol tigizgen. Qyz bosap shyǵyp, baspaldaqpen joǵary qarai júgirip, kórshilerinen kómek suraǵan. Oqiǵanyń bir bóligi beinebaqylaý kamerasyna túsip qalǵan.
Qyzdyń anasy keiin otbasynyń qaýipsizdik úshin basqa jerge kóshkenin aitqan. Onyń sózinshe, oqiǵadan keiin bala er adamdardan qorqyp qalǵan jáne kóshege jalǵyz shyǵýdan qoryqqan.
Bul is alǵash qaralǵan kezde sot er adamǵa 50 AEK, iaǵni 216 250 teńge kóleminde aiyppul salǵan. Ol kezde sottalýshynyń II toptaǵy múgedektigi, jumyssyz ekeni jáne asyraýynda kámeletke tolmaǵan balalary bary eskerilgen.
Alaida jábirlenýshi tarap alǵashqy úkimmen kelispei, isti qaita qaraýdy talap etken. Keiin alǵashqy úkimniń kúshi joiylyp, is qaita qaraldy. Prokýratýra 8 jyl bas bostandyǵynan aiyrýdy, al jábirlenýshi tarap 10 jyl jaza taǵaiyndaýdy suraǵan.
Nátijesinde sot 56 jastaǵy er adamdy Qylmystyq kodekstiń 124-babynyń 1-bóligi boiynsha kináli dep tanyp, 7 jyl 6 aiǵa bas bostandyǵynan aiyrý jazasyn taǵaiyndady. Sonymen qatar ony kámeletke tolmaǵandarmen jumys isteýge bailanysty qyzmetpen ainalysý quqyǵynan ómir boiyna aiyrǵan.
Aita keteiik, 15 maýsymda qyzdyń anasy BAQ-qa suhbat berip, oqiǵanyń qalai bolǵanyn aityp, sot úkimimen kelispeitinin jetkizdi. Onyń aitýynsha, er adam qyzǵa aqsha usynyp, dúkenge aparmaq bolǵan, keiin liftte jáne podezde oǵan tiisip, úiine kirgizbek bolǵan.
