«Sybaǵa» baǵdarlamasyna bólingen 230 millionnan astam teńgeni talan-tarajǵa salǵan sharýa qojalyqtary anyqtaldy. Bul týraly QR QM Qarjy monitoringi komitetiniń tóraǵasy Janat Elimanov aitty, dep habarlaidy QazAqparat.
«Pavlodar oblysynda «Sybaǵa« memlekettik baǵdarlamasy aiasynda iri qara mal satyp alýǵa sýbsidiia túrinde bólingen 233 mln teńgeni sharýa qojalyqtarynyń talan-tarajǵa salý faktisi anyqtaldy. Tergeý barysynda kúdiktiler 96 million teńgeden astam qarajatty qaitardy», - dedi ol Ortalyq kommýnikatsiialar qyzmetindegi baspasóz máslihaty barysynda.
Janat Elimanovtyń atap ótýinshe, mundai jedel aldyn alý sharasy óz tiimdiligin kórsetip otyr. Sondyqtan aldaǵy ýaqytta munai men munai ónimderi, shetelge kapitaldy zańsyz jylystatý salalarynda kólegeili ainalymǵa qarsy turýǵa baǵyttalǵan aldyn alý sharalary qolǵa alynatyn bolady.
Munan bólek, komitet tóraǵasy «Mańǵystaýmunaigaz» qyzmetkerlerine qatysty qozǵalǵan qylmystyq iske de toqtalyp ótti.
«Mańǵystaýmunaigaz» AQ Quqyqtyq qamtamasyz etý departamentiniń basshysy Beisenbinge, onyń orynbasary Dáýlenbaevaǵa, sonymen qatar azamat Lisovoiǵa qatysty is tergelip jatyr. Olar jalǵan kelisimsharttar jasaý arqyly 450- mln teńgeden astam qarjyny urlaý kúdigine ilikken», - dedi Janat Elimanov.
