QR Energetika birinshi vitse-ministri Murat Jórebekov suiytylǵan munai gazyna qatysty elektrondy saýda alańdary týraly aitty, dep habarlaidy QazAqparat tilshisi.
«2018 jyly baǵa belgileýdi yryqtandyrý týraly sheshim qabyldandy, osyǵan bailanysty «Gaz jáne gazben jabdyqtaý týraly» QR Zańyna sáikes 2019 jyldyń basynan bastap saýda elektrondy saýda alańdary arqyly júrgizile bastaldy. Osylaisha, bólý tártibin jáne shekti baǵalardy belgileýdi memlekettik retteýden suiytylǵan munai gazynyń ishki naryǵyn toltyrýdyń jáne óńdeýshi kásiporyndar men tutynýshylardyń múddeleriniń balansyn qurýdyń naryqtyq ádisterine kezeń-kezeńmen kóshý júzege asyrylýda», - dedi M. Jórebekov.
Onyń aitýynsha, búgingi tańda suiytylǵan munai gazynyń ishki naryqqa elektrondy saýda alańy arqyly satylatyn úlesi ishki naryqta tutynýdyń 70% quraidy.
«Biz 2019 jyly 5 paiyzdan bastadyq, qazir 70 paiyzǵa jetti. Suiytylǵan munai gazy osy elektrondy saýda boiynsha suranys pen usynysty eskere otyryp, básekege qabiletti baǵamen satylady. Zańnama talaptaryna sáikes, toptyq rezervýarly qondyrǵylar men munai-himiia kásiporyndary arqyly turǵyndardyń qajettilikteri úshin suiytylǵan gazdy satýdy qospaǵanda, aǵymdaǵy jyldyń sońyna deiin elektrondy saýda alańyna tolyq kóshý kútilýde», - dedi vitse-ministr.
Onyń sózine qaraǵanda, biylǵy qarasha aiyndaǵy ortasha kóterme baǵa tonnasyna 151 myń teńge deńgeiinde qalyptasty.
«Qalǵan 30 paiyzy ishki naryqqa QQS-pen 43 345 teńge/tonna retteletin baǵamen taratylady. Respýblika boiynsha ortasha bólshek saýda baǵasy 99 teńge/litr jáne aimaqqa bailanysty 70-120 teńge/litr aralyǵynda aýytqidy. Óz kezeginde, QR Básekelestikti qorǵaý jáne damytý agenttigi óz quzyreti sheginde baǵa belgileýdiń negizdiligin baqylaýdy júzege asyratynyn habarlaimyz. Ministrlik óz quzyreti sheginde problemalyq máselelerge monitoring júrgizedi jáne óńirlerdi suiytylǵan gazben turaqty qamtamasyz etý boiynsha sharalar qabyldaidy», - dedi M. Jórebekov.
