QR Premer-Ministri Baqytjan Saǵyntaev eńbek naryǵynyń bolashaǵyna arnalǵan halyqaralyq forýmnyń plenarlyq májilisine qatysty. Sol jerde ol sheteldik sarapshylardyń baiandamasyn tyńdap, óz pikirin bildirdi, dep habarlaidy QazAqparat tilshisi.
«Men sarapshy mamandardyń baiandamalaryn muqiiat tyńdap shyqtym. Ózim naqty úsh sheshimge keldim. Birinshiden, Qazaqstan Úkimeti osy jerde aitylǵan máselelerdiń bárin qolǵa alyp, tiisti sharalardy atqaryp jatyr. Eńbek naryǵyn damytýǵa qatysty barlyq sheshimderimiz sarapshylardyń oiymen sáikes kelip tur. Bul - qýantarlyq jáit. Ekinshiden, jańa ǵana Singapýrdan kelgen áriptesimiz aýa raiy týraly aitty. Menińshe, ystyq ári qapyryq aýa raiyna qaraǵanda sýyq jerde jumys istegen jaqsy. Óitkeni dalada aptap ystyq tursa, jumys isteý qiyn», - dedi B.Saǵyntaev.
Úkimet basshysy Aziia damý bankiniń sarapshylaryna da keńes berdi. Atalǵan mamandar Qazaqstanǵa araǵa 10 jyl salyp kelgenderi jaiynda aityp qaldy.
«Qazaqstanǵa 10 jyl saiyn emes, jii kelip turyńyz degim keledi. Sonda bizdiń ne istep, ne qoiǵanymyzdy anyq biletin bolasyzdar. Sol kezde bizdiń naqty qai baǵytta damyp kele jatqanymyzdy túsinesizder. Bul birge jumys isteýge jol ashady», - dep atap kórsetti B.Saǵyntaev.
Aita keteiik, Premer-Ministrdiń ózi plenarlyq májiliste baiandama jasaǵan bolatyn. B.Saǵyntaev Úkimettiń eńbek naryǵyn damytýǵa qatysty josparlaryn jariialady. Onyń aitýynsha, aldaǵy 7 jylda 2 million jas maman - ýniversitet pen kolledj stýdentterine jumys taýyp berý kerek.
