Almaty qalalyq Taýarlar men kórsetiletin qyzmetterdiń sapasy men qaýipsizdigin baqylaý departamentine jeke tulǵalardan zańsyz jumys istep jatqan jeke balabaqshalarǵa qatysty 22 shaǵym tústi, dep habarlaidy "Ult aqparat" departamenttiń baspasóz qyzmetine silteme jasap.
Almatydaǵy 25 555 balany mektepke deiingi mekememen qamtamasyz etip otyrǵan 509 jekemenshik balabaqsha Almaty qalalyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń qadaǵalaýynda. Onyń 366-sy (18816 bala) «Balapan» baǵdarlamasy boiynsha jumys isteidi.
«Balabaqshalarda jii oryn alatyn zań buzýshylyqtarǵa toqtalar bolsaq: toptardyń jáne aýmaqtardyń talapqa sai bolmaýy, balalardyń tamaqtaný normalarynyń buzylýy. Kóp jaǵdaida ázirlengen tamaqtar bekitilgen mázirge sáikes kelmei jatady. Mysaly, mázirde et qosylǵan qyryqqabat oramdary bolsa, is júzinde kúrish botqasyn beredi. Súttiń ornyna shái usynady. Sonymen qatar azyq-túlik sapasyn rastaityn qujattary bolmai jatady»,–dedi departament basshysy Aizat Moldaǵasymova
Mamandar túsken shaǵymdar boiynsha, mektepke deiingi 9 mekemeni tekserdi. Nátijesinde, 7 balabaqshada zań buzýshylyqtar anyqtaldy. Olardyń barlyǵyna zań talaptary týraly jazbasha túsinikteme berildi. Anyqtalǵan faktiler boiynsha 752 700 teńge somasyna 7 aiyppul salynyp, olardy joiý týraly nusqamalar taratyldy. Sondai–aq balabaqshada jeke meditsinalyq kitapshasyz jumys istep jatqan 3 qyzmetker jumystan shettetildi. Bir material sotqa jiberildi.
«Ata-ana balasy baryp júrgen balabaqshanyń tamaǵyna, oiyn alandaryna, tósek-oryn jabdyqtaryna nazar aýdarý qajet. Eger talapqa sai bolmai jatsa, olar Almatydaǵy Taýarlar men kórsetiletin qyzmetterdiń sapasy men qaýipsizdigin baqylaý departamentine júgine alady», - dep qorytyndylady Aizat Moldaǵasymova.
