Qazaqstandyq opera ánshisi Súndet Baiǵojin Italiia sahnasynda óner kórsetti, – dep habarlaidy QazAqparat.
Mysyr, Rýmynia, AQSh syndy álemniń úzdik ánshileri «Madam Batterfliai» qoiylymyn italiialyq kórermenge usynǵan bolatyn. Olardyń arasynda qazaqstandyń opera ánshi Súndet Baiǵojin bar.
«Madam Batterfliai» qoiylymyn alǵash ret sahnalap otyrǵanymyz joq. Buryn «Astana Operada» kórermenge usynǵan bolatynbyz. Desek te, bul joly jańashyldyq engizdik. Qoiylymnyń dirijery Djýzeppe Akvaviva, rejissery Lorentso Amato syndy óner sańylaqtary. Hor jergilikti «Carlo Felice» teatrynyń ánshilerinen quraldy. Álemniń túpkir-túpkirinen kelgen oryndaýshylarmen birge daiyndyq júrgizip, óner súier qaýymnyń qoshemetine bólendik. El amanaty árqashan erge qanat. Maǵan júktelgen amanatty abyroimen oryndaǵanyma qýanyshtymyn», - dep oi qosty Súndet Baiǵojin.
Qazaqstandyq opera ánshisi birneshe jyl buryn dál osy sahnada italiandyqtarǵa ulttyq naqyshtaǵy týyndylarymyzdy usynyp, «Abai» operasyn qazaq tilinde qoiǵan bolatyn.
«Bolashaqta «Carlo Felice» teatyrymen birlesken jobalardy jalǵastyrmaq niettemin. Keler jyly «Sevil shashtarazy» qoiylymyn jańasha úlgide kórermenge usyný josparlanyp otyr. Múmkin Figaronyń partiiasyn oryndap qalarmyz...», - dedi ánshi aldaǵy josparlarymen bólisip.
Esterińizge sala keteiik, Súndet Baiǵojin bir ai kóleminde Italiianyń «Carlo Felice» teatyrynda óner kórsetip, taiaýda elge oraldy. Endi «Astana Opera» teatyrynyń sahnasynda el kórermenderine jańa premeralar usynbaq.
