Soltústik óńirlerdiń eksporttyq áleýeti Reseidiń Sibir, Soltústik jáne Qiyr Shyǵys óńirlerine shamamen 1 mlrd dollardy quraidy. Bul týraly Úkimet otyrysynda QR Saýda jáne integratsiia ministri Baqyt Sultanov málim etti, dep habarlaidy "Ult aqparat".
«Soltústik Qazaqstan oblysyn damytý jónindegi Keshendi jospardyń 53-tarmaǵynda saýda-logistikalyq hab qurý kózdelgen. Saýda jáne integratsiia ministrligi Soltústik Qazaqstan oblysy ákimdigimen birlesip bul máseleni pysyqtady. Atalǵan joba iske asyrý eki kezeńnen turady. Birinshi kezeńde Ulttyq taýar ótkizý júiesi aiasynda kóterme-taratý ortalyqtary qurylady. Ekinshi kezeńde ol saýda-logistikalyq hab retinde jalǵastyrylady. Qazirgi ýaqytta Ulttyq taýar ótkizý júiesin qurýdyń birinshi kezeńi Ulttyq ekonomika ministrliginiń ekonomikalyq saraptamasy aiaqtalý satysynda. Qurylys jumystary aǵymdaǵy jyldyń sáýir aiyna josparlanǵan», - dedi ministr.
Onyń aitýynsha, Ulttyq taýar ótkizý júiesin qurýdyń ekinshi kezeńi 7 kóterme-taratý ortalyǵyn, onyń ishinde Petropavl qalasyndaǵy Saqtaý – kóterme-taratý ortalyǵyn qurýdy kózdeidi.
«Birinshi kezeńde jinaqtalǵan tájiribeni eskere otyryp, qurylys jumystary biyldyń qyrkúiek aiyna josparlanǵan. Qazaqstannyń soltústik óńirleriniń eksporttyq áleýeti Reseidiń Sibir, Soltústik jáne Qiyr Shyǵys óńirlerine shamamen 1 mlrd dollardy quraidy. Osyǵan bailanysty Petropavl qalasyndaǵy kóterme-taratý ortalyǵyn tolyqqandy ónerkásiptik, saýda jáne logistikalyq habqa odan ári damytýǵa kózdelip otyr. Habtyń mamandanýyn Qazaqstannyń soltústik óńirlerindegi aýyl sharýashylyǵy ónimderin, sondai-aq mineraldar, kómir, tsement jáne basqa da taýarlardy júzege asyrýǵa baǵyttaýdy usynamyz», - dedi Baqyt Sultanov.
«Soltústik Qazaqstan oblysy 592,3 myń tonna kartop jáne 37 myń tonna sábiz óndiredi. Kásiporyndardyń úlesi shamamen 100 myń tonnany quraidy, al qalǵan bóligi jeke úi sharýashylyqtar arqyly óndiriledi. Petropavl qalasynda saqtaý – kóterme-taratý ortalyǵyn qurý aýyl sharýashylyǵy taýaryn óndirýshilerdi 50 shaqyrym radiýsta saqtaý alańdarymen qamtamasyz etýge múmkindik beredi jáne Maǵjan Jumabaev atyndaǵy aýdandy, Qyzyljar, Mamliýt, Aqqaiyń aýdandaryn qamtidy. Soltústik Qazaqstan oblysynyń ákimdigimen Petropavl qalasyna jer telimin bólý máselesi pysyqtaldy. 21,3 gektaralańda qoimalar men temirjol beketi bar. Saýda-logistikalyq habty qurý óńirdiń damýyna, básekege qabiletti óndiristerge, ónimniń jańa túrlerin igerýge, óńirdiń aýyl sharýashylyǵy ónimderin saqtaýǵa jáne investitsiialar tartýǵa qosymsha serpin beredi», - dedi mnistr.
