Búgin Úkimet otyrysynda QR Saýda jáne integratsiia ministri Baqyt Sultanov azyq-túlik baǵasyn turaqtandyrý sharalaryn jariialady, dep habarlaidy QazAqparat.
Onyń atap ótýinshe, áleýmettik mańyzy bar azyq-túlik taýarlary baǵasyn turaqtandyrý maqsatynda Saýda, Aýyl sharýashylyǵy ministrlikteri Básekelestikti qorǵaý jáne damytý agenttigimen birlesip, baǵa turaqtandyrý boiynsha jol kartasyn ázirledi.
«Qujat 44 naqty is-sharadan turady. Ár shara boiynsha naqty oryndaý merzimi men jaýapty tulǵalar bekitiledi. Olar naýryz aiynan bastap iske asyrylady. Is-sharalardy 4 baǵytqa bólýge bolady. Birishi baǵyt - tekserýler men komplaens. Is-sharalar buqaralyq aqparat quraldar jáne áleýmettik jeliler arqyly atqarylǵan jumysty jariialai otyryp, memlekettik organdar tarapynan baǵany negizsiz kótergen naryq sýbektilerine baqylaýdy kúsheitýge baǵyttalǵan. Atap aitqanda, monopoliiaǵa qarsy is-sharalardyń ótkizilýi jáne saýda jelilerinde saýda ústemesiniń kóterilmeýi kózdeledi. Bul barlyq tekserýler moratoriige kirmeidi. Sebebi halyqtyń ómiri men densaýlyǵyna qater tóndiredi. Osyǵan orai, shekti baǵalardy belgileýmen qatar jergilikti atqarýshy, monopoliiaǵa qarsy jáne fiskaldy organdar birlesip tekserýler júrgizedi», - dedi ol.
Ministrdiń atap ótýinshe, ekinshi – saýda is-sharalar. Ol qoldanystaǵy tetikterdi jetildirýdi kózdeidi.
Osy sharalardy oryndaý úshin ákimdikter saýda saiasatyn iske asyrý jumysyn jáne baqylaý fýnktsiialaryn kúsheitýi qajet.
Onyń ishinde shekti baǵalardy belgileý, naryq sýbektilerimen sharttar jasasý, «ainalym shemasyn» ulǵaitý usynylady.
Buǵan qosa, eksporttyq taýarlar men shikizatqa kvotalardy ornatý qarastyrylǵan.
«Úshinshi baǵyt - óndiristi ulǵaitý jáne kásiporyndardy qoldaý. Is-sharalar kásiporyndardyń óndiristik qýattaryn ulǵaitýǵa, shyǵyndardy óteý jáne qoldanystaǵysýbsidiialardy qaita qaraý arqyly yntalandyrýǵa baǵyttalǵan. Áleýmettik mańyzy bar taýarlar óndirýshileri úshin elektr energiiasy tarifterin bir qalypta ustaý kózdelgen.Budan basqa, importqa joǵary táýeldi taýarlarǵa baǵdarlana otyryp, turaqtandyrý qorlary qaita qaralatyn bolady. Aýyl sharýashylyǵy ministrligi Azyq-túlik kelisim shart korporatsiiasymen birlesip kóktemgi egis jumystary kezinde forvardtyq kelisimsharttardy ulǵaitý jónindegi jumysty kúsheitedi»,- dedi Baqyt Sultanov.
Ministrdiń atap ótýinshe, tórtinshi baǵyt - zańnamalyq ózgerister. Bul baǵytta memlekettik satyp alýdyń konkýrstyq rásimderin ońailatý, shekti baǵalardy belgileý týraly qaýlylardy kelisý merzimderin qysqartý, baǵalardy boljaý tetigin engizý siiaqty túbegeili ózgerister qarastyrylǵan.
«Memleket basshysynyń halyqqa arnalǵan Joldaýynda tapsyrylǵan, Ulttyq taýar ótkizý júiesi men áleýmettik ámiianyn jedel iske qosý bir jaǵynan baǵany turaqtandarady, ekinshi jaǵynan otandyq taýar óndirýshiler úshin ónimderin satý naryǵyna jáne olar úshin ekonomikanyń ainalymyndaǵy qarjy resýrstarynyń qol jetimdiligin arttyrýǵa múmkindik beredi», - dedi ministr.
