Astana ákimi Baqyt Sultanov qalada ashyq qalatyn qudyqtardyń problemasyna toqtaldy, dep habarlaidy "Ult aqparat".
Sultanovtyń aitýynsha, qudyqtardyń ashyq nemese jabyq ekeni beinekameralardyń kómegimen anyqtalyp jatyr.
"Bul úlken problema, sizder bilesizder, adam ólimine ákep soqqan oqiǵalar bar, kúni keshe ǵana bir bala tabyldy. Biz qudyqtardy salǵandar men olardy ashyq qaldyrǵandarǵa qatysty túrli shara qoldanamyz. «Sergek» kameralarynyń arqasynda ashyq jatqan káriz qudyqtaryn anyqtap otyrmyz. Azamattardan saq bolýdy jáne der ýaqytynda habarlaýdy ótinemin. Kommýnaldyq qyzmetterden kún saiyn aralap, qadaǵalap júrýin suraimyz", - dedi ákim halyqqa esep berý kezdesýinde.
Ol kúzden beri myńdaǵan qudyqtyń ashyq qalǵany anyqtalǵanyn atap ótti.
"Qala turǵyndarynyń iKomek júiesi bul problemaǵa bei-jai qaramaityny qýantady. Ashyq qalǵan qudyqtar týraly aqpar túsken sátte-aq, shara qabyldaýǵa tyrysamyz. Biraq olardy únemi urlap ketedi. Qudyqtyń betin jabasyń, tańerteń joq bolyp shyǵady. Azamattarǵa taǵy bir márte aitarym, saq bolyńyzdar. Der kezinde habar berýdi suraimyn", - degen ákim metall qabyldaityn oryndarǵa qatysty sharalar da qolǵa alynǵanyn aitty.
Jalpy, ákim deregine qaraǵanda, qalada 6 myń «Sergek» kamerasy ornatylyp, jumys istep tur. Sonyń arqasynda aýlalarda oryn alatyn qylmys eki esege tómendegen.
«Sergektiń» arqasynda jol-kólik oqiǵasynyń saldarynan bolatyn ólim-jitim de 2 ese tómendedi», - dedi B.Sultanov.
