Astana ákimi Baqyt Sultanov kóp balaly analarmen kezdesýge olardyń máselesin sheshý úshin qandai sharalar qolǵa alynyp jatqanyn aitty, dep habarlaidy Sputnik Qazaqstan tilshisi.
"Elbasy naqty tapsyrma berip, úkimettiń janynan tiisti jumys toby quryldy. Onyń nátijesin kútpei Astanada ár aýdandyq ákimdikterdiń janynan tiisti jumys toptary qurylyp, sizderden usynystar jinap, úkimettiń janyndaǵy jumys tobyna daiyndaimyz. Sizderdi qabyldaý úshin ár ákimdikte holda arnaiy stoldar qoidyq, esikterdiń bári ashyq. Biraq osylai jinalyp, shýlap, qatty aitqandaryńyz durys emes. Dialog konstrýktivti túrde bolý kerek. Ár otbasynyń jai-kúii qaralatyn bolady. Men ýáde berip otyrmyn. Qazaqstannyń túkpir-túkpirinde aitqan sózderińiz estildi, barlyq jaqta sharalar qabyldanyp jatyr", - dedi Baqyt Sultanov.
Ákimniń aitýynsha, baspana máselesin bir kúnde sheshý múmkin emes.
"Kóp jyldan bergi másele. Bul jaǵynan da tiisti tapsyrmalar bar. Jumys tobynda bul másele eń úlken problema retinde qaralyp jatyr. Ony sheshýdiń birneshe quraly bar. Astanada "Elorda damý" degen uiymdastyrýshy kompaniia qurylǵan. Oǵan respýblikalyq biýdjetten aqsha bólinip, birneshe problema sheshilip jatyr. Apattyq úilerdiń bári buzylyp, jańa úiler salynýda. Otbasylarǵa jańa páterler berilip, qalǵandary naryqqa jiberildi. Sonyń arqasynda Astanada kezekte turǵan biraz adamnyń máselesi sheshilip jatyr", - dedi ákim.
Budan bólek, ol úleskerlerdiń máselesi qalai sheshilip jatqanyn da aityp ótti.
"15 myń páter salyp, olardy naryqta satyp, 10 myń úleskerdiń máselesin sheshýdi josparlap otyrmyz. Osy quraldardy kópbalaly otbasylardyń máselesin sheshý úshin de paidalana alamyz", - dedi ol.
Sultanov qazir Astanada 45 myń adam kezekte turǵanyn aityp ótti. Olardyń bárin baspanamen qamtamasyz etý úshin 1 trillion teńgedei qarajat kerek.
"Sondyqtan bir kúnde sheshiletin másele emes, birtindep jasaý kerek. Ekinshi másele – járdemaqy. Bul másele úkimettiń quzyrynda, ol jumys tobynda qaralyp jatyr. Sheshimdi kúteiik", - dedi Astana ákimi.
Aita keteiik, Astana ákimi Baqyt Sultanov búgin kóp balaly analarmen kezdesýge májbúr boldy.
Kóp balaly áielder 15 aqpan kúni tańerteń elordalyq ákimdik ǵimaratynyń aldyna jinalyp, qala basshylyǵymen kezdesýdi talap etti.
Budan buryn ákimdik kóp balaly analardyń Sultanovpen kezdesýi bolmaitynyn jariialap, otbasylardyń búkil máselesi aýdandyq ákimdikterde qaralady dep málimdegen edi.
