Sýdialardy ózgeniń biznesin reiderlik basyp alý úshin jii paidalanady. Bul týraly búgin respýblikalyq sýdialardyń keńeitilgen keńesinde QR Joǵarǵy sotynyń tóraǵasy Jaqyp Asanov málim etti, dep habarlaidy QazAqparat tilshisi.
Máselen, onyń aitýynsha, Almatyda bir kompaniia 600 mln teńgege munai satqan. Ónimdi jetkizý merzimi 9 ai dep belgilengen. Degenmen, satyp alýshy belgilengen merzimdi kútpesten sotqa júginip, 600 mln teńgeni qaitarý jáne shyǵyndy óteý týraly talap túsirgen. Buǵan qosa, sarapshy shyǵynnyń kólemin 6 mlrd teńge dep baǵalaǵan. Almaty soty satyp alýshynyń barlyq talabyn qanaǵattandyrǵan. Al Aqmola oblysynda bir firmanyń ekinshi firmanyń aldynda 10 mln teńge qaryzy bolǵan. Sot atalǵan firmany bankrot dep tanyǵan. Alaida onyń milliard teńgelik aktivi bar.
«Túrli qatelikter bolatyndyǵyn túsinemin. Zańdy durys qoldanbaý da bolyp jatady. Degenmen, dál osyndai syzbalarda, ózgeniń biznesin basyp alýdyń reiderlik syzbalarda bizdi paidalaný - bul qylmys. Áriptester mundai bolmaidy. Biznes ókilderine de júgingim keledi. Biz taiaý aralyqta Joǵarǵy sotqa qalai júginýge bolatyndyǵy týraly nusqaýlyq jasaimyz», - dedi ol.
Joǵarǵy sot tóraǵasynyń aitýynsha, kúnine 5-6 kitapqa júk bolarlyq 150-dei ótinish túsip jatady.
«Sizderge aitaiyn, men olardy oqimyn dep ýáde bere almaimyn. Munymen tolyqtai ainalyssam da ol múmkin emes. Sondyqtan biz kásipkerlik sektorǵa ótinishti 1 betke qalai durys jazý kerektigin úiretetin bolamyz», - dedi Jaqyp Asanov.
