Foto: ashyq derekkóz
Qazaqstanda turmystyq jaǵdaida sýdy únemdeýdiń jańa ádistemelik usynystary ázirlendi, dep habarlaidy Ult.kz.
Sý resýrstary jáne irrigatsiia ministrligi usynǵan keńester sýdy utymdy paidalaný mádenietin qalyptastyrýǵa baǵyttalǵan.
Ministrlik málimetinshe, qarapaiym erejelerdi saqtaý arqyly alty adamnan turatyn bir otbasy jylyna 35 myń litrge deiin sý únemdei alady.
Usynylǵan keńester qatarynda:
-
kir jýǵysh jáne ydys jýǵysh mashinalardy tek tolyq júktememen qosý;
-
tis tazalaǵanda krandy jaýyp, staqanmen sý ishý;
-
vannanyń ornyna qysqa dýsh qabyldaý;
-
kókónis pen jemisterdi aǵyp turǵan sýdyń ornyna ydysta jýý;
-
avtomatty sensorly krandardy qoldaný;
-
ýnitazdarǵa eki deńgeili sý jiberý júiesin ornatý;
-
sýdyń qysymyn retteitin aeratorlardy paidalaný;
-
aqaýy bar krandardy der kezinde jóndeý sekildi kúndelikti qoldanýǵa bolatyn qarapaiym, biraq tiimdi ádister bar.
Ministrlik bul usynystardy halyqqa keńinen taratý úshin kóshelerde, mektepter men ýniversitetterde, vokzaldar men áýejailarda aqparattyq bannerler ornalastyrýdy josparlap otyr.
«Biz turmysta sýdy únemdeýdiń mańyzyn múmkindiginshe kóp adamǵa jetkizgimiz keledi. Árbir azamat eldiń sý resýrstaryn saqtaýǵa úles qosa alady. Ministrlik ázirlegen usynystar sýdy únemdeý – ońai ári tiimdi ekenin kórsetip otyr», – dedi Sý resýrstary jáne irrigatsiia ministri Nurjan Nurjigitov.
Ministrlik aldaǵy ýaqytta aqparattyq-túsindirý jumystaryn kúsheitip, usynystardy elimizdiń barlyq óńirlerine jetkizýdi kózdep otyr.
