Búgin Parlament palatalarynyń birlesken otyrysynda Senator Aqylbek Kúrishbaev Qazaqstannyń agrarlyq saladaǵy ǵylymyna qatysty pikir bildirdi, dep habarlaidy QazAqparat.
«Biz azyq-túlik naryǵyndaǵy qalyptasqan jaǵdaidyń kúrdeli ekenin túsinemiz. Degenmen, agrarlyq derjava bola tura, aýyl sharýashylyǵy ónimderiniń negizgi túrlerin eksporttaýshy álemdik 10 memlekettiń qataryna kire otyryp, azyq-túlik infliatsiiasynyń deńgeii boiynsha kóptegen elderdiń aldynda turǵanymyz syn kótermeidi. Bul - salada júieli problemalardyń bar ekendigin kórsetedi. Senat depýtattary egin jinaý boiynsha statistikalyq málimetterdiń, azyq-túlikti tutynýdyń qabyldanǵan fiziologiialyq normalarynyń shynaiy jaǵdaiǵa sáikes kelmeitinine birneshe ret Úkimet nazaryn aýdarǵan bolatyn», - dedi Kúrishbaev.
Sonymen qatar ol memleketten sýbsidiia alyp otyrǵan otandyq sharýalarǵa ishki naryqty azyq-túlikpen qamtamasyz etýde eshqandai jaýapkershilik júktelmeitinin aitty.
«Basqa agrarlyq elderge qaraǵanda, bizde azyq-túlik klasterleri damymaǵan. Azyq-túlik infliatsiiasynyń sebepterin importtyq taýarlarynyń qymbattaýymen túsindiremiz. Shyn máninde, bul árdaiym solai bola bermeidi. Máselen, kórshilerimizde bizdiń basty daqylymyz – bidaidan bastap, aýyl sharýashylyǵy ónimderiniń kóptegen túrleriniń ózindik quny tómen. Nege bulai? Sebebi biz agrarlyq salany ǵylymi qamtamasyz etý boiynsha olardan edáýir artta qalyp otyrmyz. Bir mysal keltireiin, sońǵy 15 jyl ishinde Reseide jazdyq bidaidyń ónimdiligi 30% - ǵa ósti, al bizde tek 15%, iaǵni eki ese az», - dedi senator.
Budan bólek depýtat elimiz aýyl sharýashylyǵy óndirisine qajetti tehnologiianyń negizgi bóligin shetelden satyp alatynyn aitty.
«Qazirgi kezde bidai sorttarynyń 60-70%-yn, al birqatar daqyldar boiynsha 100%-yn ózge elderden ákeletin jaǵdaiǵa keldik. Ashyǵyn aitsaq, eger Resei tuqym eksportyna tyiym salsa, Soltústik Qazaqstan suryptyq materialsyz qalady. Qazir Qazaqstannyń agrarlyq ǵylymy ábden quldyrap ketti. Byltyr agrarlyq ǵylymi zertteý institýttary biýdjettik qarjyny tek qyrkúiekte (iaǵni, 8 aidan keiin) aldy. Al biyl ǵalymdar mamyr aiynyń sońyna deiin jalaqysyz otyrdy. Kezinde sheteldik áriptestermen birlesip, álemdik úzdik tájiribeni eskere otyryp, Shortandyda halyqaralyq agrarlyq-ǵylymi ortalyqty jáne zamanaýi agrarlyq-zertteý ýniversitetterin uiymdastyrý jobalary ázirlengen bolatyn. Alaida olardyń barlyǵy Úkimetten qarjylyq qoldaý tappady. Búginde dúkenderdegi taýarlardyń baǵalaryna qarap biz mundai saiasattyń qaida ákelgenin kórip otyrmyz», - dedi Kúrishbaev.
