Rýzaevka aýylynda sý tasqynynan zardap shekkenderge alǵashqy ótemaqylaryn tólei bastady, dep habarlaidy «QazAqparat» HAA tilshisi óńirlik OKQ-ǵa silteme jasap.
Ǵ.Músirepov atyndaǵy aýdan ákimi Vladimir Dýdovtyń aitýynsha, oblystyq ákimdiktiń qorynan tabiǵi apattyń zalalyn óteý úshin 53,5 mln teńge bólindi. Rýzaevka aýylynyń kómek qoryna 19 mln biýdjetten tys qarjy tústi.
Sý tasqyny Rýzaevka aýylyndaǵy 12 úidi qiratty. Bul otbasylarǵa biýdjettik jáne biýdjetten tys qarjy esebinen úiler men páterler satyp alyp berildi.
Seralinder otbasy jańa úige kóshken alǵashqy otbasylardyń biri. Sý tasqyny kezinde Elvira Seralina tek qujattaryn ǵana alyp úlgergen, olardyń basqa dúnieleri sý astynda qalǵan. Olar úidi uzaq tańdaǵanyn jasyrmady.
«Bizge úsh úi kórsetti. Bizdiń tańdaǵan úiimiz 2 mln teńge turady. Úlken, keń ári barlyq jaǵdai jasalǵan - kólikjai, monsha, baqsha, birneshe bólmeleri bar. Úidiń burynǵy iesi bizge barlyq jihazdar men tehnikany qaldyryp ketti. Bizge qolushyn sozǵan barlyq adamdarǵa alǵys aitqym keledi», - dedi Rýzaevka aýylynyń turǵyny Elvira Seralina.
Liliia Afanaseva da jańa páterde qonys toiyn toilady. Áielge bir bólmeli páter tidi. Ol óziniń eski úiinen jihazdary men turmystyq tehnikalaryn jańa baspanasyna jetkizip aldy.
Rýzaevka aýylynyń turǵyndaryna qoldaý kórsetý úshin qaiyrymdylyq is-sharasy ótkizildi. Barlyǵy 9 million teńge jinaldy. Bul qarjyǵa azyq-túlik, kiim-keshek, aiaq-kiim, qurylys materialdary, turmystyq tehnika satyp alyndy. Rýzaevka aýyldyq okrýginiń ákimi Igor Kobialkonyń aitýynsha, aýylda 88 otbasy qiyn jaǵdaiǵa tap bolǵan.
Ǵ.Músirepov atyndaǵy aýdanda sý tasqyny kezinde 120 úidi sý aldy, onyń 108-i - Rýzaevka aýylynda, 8 úi Andreevka aýylynda, qalǵany Chistopole aýylynda ornalasqan.
